Jergilikti jaýapkershiligi shekteýli seriktestikterdiń birine tıesili úsh “Kamaz” kóliginiń akkýmýlıatorlaryn qoldy qylǵan úsh kúdikti ustaldy, – dep habarlaıdy Polisia.kz.
5 qazan kúni Qaraǵandy qalalyq Polısııa basqarmasyna qarasty Oktıabr polısııa bólimine belgisiz bireýlerdiń úsh “Kamaz” júk kóliginen jalpy quny 336 myń teńge turatyn alty akkýmýlıator urlap ketkendigi týraly habarlama túsken. Júk kólikteriniń barlyǵy jergilikti jaýapkershiligi shekteýli seriktestikterdiń birine tıesili ekeni belgili boldy.
Kólikter qurylys alańyna materıal ákelip turǵan. 1 qarasha kúni krımınaldyq polısııa qyzmetkerleri jedel-izdestirý is-sharalaryn ótkizý barysynda osy iske qatysy bar degen kúdikpen úsh azamatty ustady. Kúdiktilerden aıǵaq zattar tárkilendi. Atalǵan fakt boıynsha Qazaqstan Respýblıkasy Qylmystyq kodeksiniń 188-babyna (Urlyq) sáıkes qylmystyq is qozǵalyp, tergeý amaldary júrgizilýde.