Keshe ǵana iske qosylǵan eski agrotehnıkalardy qaıta óńdeýge qabyldaýdyń pılottyq baǵdarlamasy rekordtyq suranysqa ıe boldy. Pılottyq baǵdarlama aıasynda elimizdiń on qalasynan 100 traktor men 20 kombaın qabyldaý mejelengen. Alaıda tozyǵy jetken tehnıkalaryn qos-qostan tapsyrýǵa nıet bildirýshilerdiń kóptigi sonsha, bólingen kvota bir kúnniń ishinde ıgerildi. Pılottyq baǵdarlamaǵa kirmegen qalalardyń ózinen suranys artyp otyr, dep habarlaıdy Egemen.kz
Tozyǵy jetken agrotehnıkany qabyldaýdyń pılottyq baǵdarlamasy Qazaqstannyń 10 aımaǵynda (Petropavl, Qostanaı, Pavlodar, Kókshetaý, Qaraǵandy, Taldyqorǵan, Semeı, Shymkent, Qyzylorda, Taraz) júzege asyrylýda. Aıta ketý kerek pılottyq joba aıasynda kombaındar ázirge Petropavl, Qostanaı, Pavlodar, Kókshetaý qalasynda qabyldanady. Traktorlar men kombaın tapsyrǵandarǵa jeńildik sertıfıkattary beriledi. Jeńildik sertıfıkatynyń quny aýylsharýashylyǵy tehnıkasynyń túri men jıntyǵyna baılanysty 560 myń teńgeden 2 mıllıon teńgege deıin baǵalanady.
Jeńildik sertıfıkatyn Qazaqstanda qurastyrylǵan jańa aýyl sharýashylyǵy tehnıkasyn nemese elimizde shyǵarylǵan avtokólik quralyn satyp alatyn kezde paıdalanýǵa bolady. Aıta ketý kerek jeńildik sertıfıkatymen K-730, K-742, K-740 sııaqty elimizde keń qoldanysta júrgen premıým sanatyndaǵy tehnıkalardy jáne Lovol, Belarýs traktorlaryn, Essil, Acros kombaındaryn jáne basqa da modeldegi tehnıkalardy satyp alý kezinde paıdalanǵa bolady.
Jańa tehnıkalardyń barlyq modelderin otandyq aýylsharýashylyq tehnıkalaryn jáne avtomobıl óndirýshilerdiń resmı saıttarynan kórýge bolady.