Karıb teńizinde bastalǵan «Eta» daýylynyń ekpini kúsheıip keledi. Sarapshylardyń boljaýynsha, aldaǵy táýlikte doly jel odan saıyn qutyryp, onyń deńgeıi besinshi sanatqa jetýi múmkin. Degenmen AQSh Ulttyq ortalyǵynyń habarlaýynsha, «Eta» úıirip soqqanymen, jyljý qarqyny báseńdeý. Qazirgi tańda jeldiń jyldamdyǵy sekýndyna 54 metrge jetken. Soǵan qaramastan, daýyldyń jyldamdyǵy kez kelgen sátte artyp ketýi yqtımal.
Jalpy, «Eta» Nıkaragýaǵa ǵana baǵyt alǵan joq. Sol sebepti Ortalyq Amerıkadaǵy birqatar memleket apatqa qarsy turýǵa daıyndyqty bastap ketti. Máselen, Nıkaragýada jaǵajaılar jabylsa, Gondýrasta da daýyl týraly jappaı eskertý jasaldy. Budan bólek, Meksıka, Panama sekildi elderde mol jaýyn-shashyn bolatyny habarlandy.
AQSh Ulttyq ortalyǵy jaýyn-shashynnyń mol túsýi saldarynan taýly aımaqtarda kóshkin júrip, sel basý qaýpi bar ekenin jetkizdi. Ásirese Iаmaıka, Meksıkanyń ońtústik-shyǵysy, Salvador, Gaıtıdiń ońtústik bóligi jáne Kaıman araldarynda ózenderdegi sý deńgeıiniń kóterilýi ábden múmkin.
Daýyl Nıkaragýa men Gondýrastyń taýly aýdandaryna jetip, sodan keıin soltústikke, Belız jaqqa qaraı baǵyt almaq. Biraq qazir daýyldyń traektorııasy men qarqynyn anyqtaý óte qıyn. Aıta keterligi, «Eta» – bıylǵy 28-shi daýyl. Osylaısha, bir jyldaǵy dúleı jeldiń kórsetkishi boıynsha rekord jańartyldy.