Elimizdiń joǵary bilim berý salasynda ózindik dástúri bar ári sapaly maman daıarlaýǵa úles qosyp otyrǵan oqý orynyń bir – Taldyqorǵandaǵy Ilııas Jansúgirov atyndaǵy Jetisý ýnıversıteti. Búginde ýnıversıtet álemdik standartqa saı oqý júıesine kóship, stýdetterge birden eki mamandyq ıesi atanýǵa jaǵdaı jasap otyr, - dep habarlaıdy Egemen.kz.
Máselen, 2016 jyldan beri bilim ordasy qos dıplomdy oqytý júıesine qosylǵan bolatyn. Osy jyldan bastap Ilııas Jansúgirov atyndaǵy Jetisý ýnıversıteti men Polshanyń Lıngvıstıka-tehnıkalyq ýnıversıteti yntymaqtastyqqa qol qoıyp, jetisýlyq stýdentterdiń eki jaqty bilim alýyna jaǵdaı jasaǵan edi. Nátıjesinde qos ýnıversıtettiń dıplomyn alyp shyqqan jas maman sany ósip otyr. О́tken 4 jylda 9 stýdent yntymaqtastyq aıasynda dıplom qorǵap, qajetti mamandyq ıesi atanǵan eken. Bul dástúr 2019-2020 oqý jylynda da jalǵasyn tapqan. Jaqynda taǵy birneshe stýdent eki ýnıversıttiń dıplomyna ıe boldy.
- Bizdiń ýnıversıtet pen Polshanyń oqý orny arasyndaǵy kelisim óz jalǵasyn tapty. Atapaıtqanda, «Qazaq tili jáne ádebıeti» mamandyǵynyń magıstranttary Galymova Alıma men Qajybekova Aqbota, «Tarıh» mamandyǵynyń magıstranttary Valıtov Sýltan men Absemetov Abdel jáne «Quqyqtaný» mamandyǵynyń magıstranty Júnis Nurjan Polsha Respýblıkasyndaǵy Lıngvıstıka-tehnıkalyq ýnıversıteti men I.Jansúgirov atyndaǵy Jetisý ýnıversıtetinde 2 jyl kóleminde bilim alyp shyqty. Magıstranttar qos dıplomdy bilim berý baǵdarlamasynyń barlyq talaptary men erejelerin saqtaı otyryp, eki magıstrlik dıssertasııa jazyp, ony sátti qorǵady. Olarǵa maýsym aıynda I.Jansúgirov atyndaǵy Jetisý ýnıversıtetiniń dıplomy berilgen, al jaqynda eýropalyq úlgidegi dıplomdar túlekter qolyna tıdi. Osyǵan oraı, saltanaty jıyn ótip, I.Jansúgirov atyndaǵy Jetisý ýnıversıtetiniń akademııalyq máseleler jónindegi prorektory Danııar Qaldııarov jastardy quttyqtady. Eki ýnıversıtet arasyndaǵy ózara yntymaqtastyq jáne qosdıplomdy bilim berý isi aldaǵy ýaqytta da óz jalǵasyn tappaq, - deıdi ýnıversıtettiń baspasóz qyzmetiniń jetekshisi Baıan Shaıanbaeva.
Jalpy, ýnıversıtettiń óz stýdentterine qolaıly bilim alý úshin jaǵdaı jasap otyrǵanyna jastar da, ata-analar da dán rıza. Ásirese, jataqhanamen qamtý isinde bilim ordasynyń tabysy birshama. Bıyl stýdentterge arnalǵan 288 oryndyq kópqabatty jańa jataqhana ǵımaraty paıdalanýǵa berildi. Bul nysan Elbasy Nursultan Nazarbaevtyń «Bes áleýmettik bastamasynyń» aıasynda iske qosylǵan bolatyn. Jataqhana qurylysy ótken jyly qolǵa alynyp, bul maqsatqa oblystyq bıýdjetten 2,3 mlrd teńge jumsaldy. Sonyń nátıjesinde aınalasy bir jyldyń ishinde 13 qabatty, sáýleti kelisti jańa jataqhana boı kóterdi.
I.Jansúgirov atyndaǵy Jetisý memlekettik ýnıversıtetiniń stýdentteri úshin berilip otyrǵan bul nysan bilimgerlerdiń ómir súrý jaǵdaıyn jaqsartyp, bilim sapasyn arttyratyny sózsiz. Qazir munda «Aınalaıyn» balalar úıiniń tárbıelenýshileri arasynan shyqqan stýdentter men ınternet jyldamdyǵy baıaý shalǵaı eldi mekenderden kelgen 13 bilim alýshy jas turyp jatyr eken.
Almaty oblysy