Nur-Sultan qalasy turǵyndary men oǵan jaqyn ornalasqan eldi mekenderdi (Arshaly, Arnasaı, Shóptikól, Ijevskıı) sýmen qamtamasyz etetin Astana sý qoımasynyń syıymdylyǵy – 410,90 mln tekshe metrdi quraıdy. Bul týraly sý qoımasyn tilshilerge kórsetken "Qazsýshar" MKM Aqmola oblystyq fılıalynyń dırektory Ýálı Dáli aıtty, dep jazady Egemen.kz
Onyń sózinshe, sý qoımasy 2021 jyldyń kóktemgi sý tasqyny kezeńine daıyn. Degenmen tıimdi sharalardy talap etetin máseleler de bar.
"Esil ózeninde ornalasqan Astana sý qoımasy 1970 jyly salynǵan. Sý ótkizý qýaty – sekýndyna 1910 tekshe metr. Qazir 328 mln tekshe metr sý jınadyq, ıaǵnı 80%-ǵa tolǵan. Paıdalanýǵa berilgenine 50 jyl boldy desek, sý qoımasy úshin bul kóp ýaqyt. Jibek joly aýyly men 42-razezd aýmaǵyndaǵy Esil ózeni arnasynyń sý ótkizý qýaty edáýir tómendep ketti. Buǵan ýaqytsha salynǵan qubyrly ótkelder men sýdyń baldyrlarǵa tolyp ketýi sebep. Sondyqtan jergilikti atqarýshy organ ózen arnasyn tazalap, aýyldar aınalasyna bóget salýy kerek", dedi Ýálı Dáli.
Sý tasqyny kezeńindegi tótenshe jaǵdaılardyń aldyn alý úshin Qazsýshardyń Aqmola oblystyq fılıaly jyl saıyn "Qazgıdromettiń" bergen málimetteri boıynsha Esil basseındik sý ınspeksııasynyń bekitýimen qalaǵa sý jiberýdiń boljamdy kestesin jasaıdy.
"Ol Nur-Sultan qalasy ákimdigimen kelisiledi. Sonymen birge kún saıyn sý kólemin esepteımiz. "Astana sý arnasy" mekemesi Nur-Sultan qalasy úshin jylyna 80-90 mln mln tekshe metr kóleminde sý alady. Al Arshaly aýdanyndaǵy birneshe aýylǵa aıyna 40 myń tekshe metr sý beriledi. Sonymen birge Elordadaǵy Esil ózeniniń deńgeıin ustap turý úshin sanıtarlyq sý jiberemiz", dep túsindirdi fılıal basshysy.
Aıta keteıik, "Qazsýshar" RKM Aqmola oblystyq fılıaly balansynda 7 sý qoımasy bar. Olar – Astana, Esil, Seleti, Chaglınskoe ján Podlesnenskoe sý qoımalary. Elordany sý tasqynynan qorǵaý úshin 2010 jyly qorǵanys bógeti salynǵan.