Qazaqstan jol ǵylymı-zertteý ınstıtýtynyń ǵalymdary óziniń ǵylymı qyzmetin jalǵastyrýda. Olar osydan tórt jyl buryn álemdik jol salasynda tómengi temperatýraly jaryqshaqtaný kezinde asfaltbetondy jol tóseminiń ózin-ózi qurý zańdylyǵy jaıly jańalyqty alǵash ashqanyn aıtyp ótken jón, dep jazady Egemen.kz
Qazir ınstıtýttyń arsenalynda 3 ǵylymı jańalyq bar: "Tómengi temperatýraly jaryqshaqtaný kezinde asfaltbetondy jol tóseminiń ózin-ózi qurý zańdylyǵy" jáne "Asfaltbeton jamylǵysynyń satylyq tozyp buzylý zańdylyǵy (Teltaev qaǵıdasy) jáne byltyr jarııalanǵan "Nanoqurylymdy bıtýmnyń paıda bolý qubylysy"
Sońǵy 5 jylda QazjolǴZI qyzmetkerleri halyqaralyq ǵylymı jýrnaldarda 136 maqala men monografııa jarııalaǵan. 84 jumys Scopus málimetter bazasynda bolsa, 52-si Web of Science halyqaralyq bazasynda saqtaýly. Búgingi kúnge deıin atalmysh maqalalar dáıekkóz retinde 679 ret paıdalanylypty.
Ǵylymı zertteý jumystaryn QazjolǴZI praktıkalyq iske asyryp, patenttegen. Osylaısha 2015 jyldan bastap ınstıtýt 16 ónertabys patentin alypty. Onyń 4 – halyqaralyq.