Eńbekshi aýdany turǵyndarynyń 96% sapaly aýyz sýmen qamtylǵan. Qalǵan 4% qamtý 2021-2022 jyldyń josparyna engizilgen. Aýdanda jyl sońyna deıin Badam-1,2 turǵyn alabynda aýyz sý júıesiniń qurylysy aıaqtalyp, el ıgiligine beriledi. Al, Abdýllabad turǵyn alabynda aýyz sý júıesine júrgizilip jatqan jóndeý jumysyn jeltoqsan aıynyń 15-ne deıin aıaqtaý josparlanǵan, dep habarlaıdy Egemen.kz Shymkent qalasy ákiminiń baspasóz qyzmetine silteme jasap.
Bul jóninde Eńbekshi aýdanynyń ákimi Ǵalymjan Ilıasov aqparattyq-kommýnıkasııalyq ortalyqta ótken brıfıngte aýdandy ınfraqurylymmen qamtý týraly baıandady.
Aýdan ákiminiń sózinshe turǵyndardy sapaly elektrmen qamtý 93%. Jumyspen qamtý jol kartasy aıasynda Juldyz, Jalyn, Qarabastaý turǵyn alaptaryn elektr júıesimen qamtý jumysyna bastapqy qarajat bólinip, merdiger mekeme anyqtalǵan. Qazirde Juldyz turǵyn alabynda qurylys jumysy bastalyp, joba 2021 jylǵa ótpeli.
–Halyqty memlekettik júıedegi tabıǵı gazben qamtý 87,7% bolyp otyr. Qalǵan jekemenshiktegi gaz 2023 jylǵa deıin tolyq memlekettik júıege ótkiziledi. Qazir Badam turǵyn alabyndaǵy 331 abonentti gazben qamtamasyz etý úshin qurylysyna bastapqy 50 mln teńge qarjy bólinip, ishki oramǵa gaz qubyryn tartý jumystary júrgizilip jatyr. Nysan 2021 jylǵa ótpeli, -dedi aýdan ákimi.
Aýdan ákimi óz baıandamasynda turǵyndardy káriz júıesimen qamtý jóninde de aıtyp ótti. Bıyl Mıras, Shapaǵat-2, Ulaǵat shaǵynaýdarynda káriz júıesiniń qurylysy bastalyp, 2021 jyly paıdalanýǵa beriledi. Soltústik-shyǵys shaǵyn aýdanyna jobalyq smetalyq qujat ázirlenip, keler jyly qurylysqa bıýdjettik ótinim berilgen.