Búgin Qazaqstan halqy Assambleıasy keńesiniń otyrysynda Tuńǵysh Prezıdent – Elbasy, QHA Tóraǵasy Nursultan Nazarbaev ýaqyt talabyna saı bolýymyz kerektigin alǵa tartty, dep habarlaıdy Egemen.kz
"Shırek ǵasyrdyń ishinde Assambleıa nátıjeli konsýltasııalyq-keńes organynan óziniń parlamenttik ókili bar jalpyhalyqtyq ınstıtýtqa aınaldy. Ol azamattyq qoǵamnyń ámbabap qurylymynyń barlyq úzdik sıpattamasyn ózine sińirip, dostyq, beıbitshilik, tynyshtyq pen senim Qazaqstannyń qoǵamdyq ómiriniń ajyramas bóligine aınalýy úshin mańyzdy úles qosty. Dál osy Táýelsizdigimizdiń damýy men ulttyq qalyptasý úshin bastapqy shart boldy. Barlyǵymyz da bul jetistik eń aldymen elimizdiń barlyq azamattarynyń arqasynda oryn alǵanyn jaqsy túsinemiz", dedi Elbasy.
Tuńǵysh Prezıdent etnosaralyq, konfessııaaralyq kelisimdi buzatyn kez kelgen árekettiń Konstıtýsııaǵa saı emestigin naqtylaıtyn zań qabyldanǵanyn atap ótti.
"Sol arqyly biz barlyq azamattarymyzdyń quqyǵyn qorǵaımyz. Bul saladaǵy Qazaqstan saıasaty qabyldanǵan barlyq halyqaralyq standarttarǵa jaýap beredi. BUU, EQYU syndy uıymdar bizdiń etnosaralyq qarym-qatynas modelimizge jáne ulttar birligin nyǵaıtýǵa baǵyttalǵan kúsh-jigerimizge joǵary baǵa berip, jumysymyzdy ózgelerge úlgi etip otyr. Biz "Rýhanı jańǵyrý" degen ataýmen qoǵamdyq sanany jańǵyrtý baǵdarlamasyn bastadyq. Onyń maqsaty − jańa shynaıy jaǵdaıda halqymyzdyń sanasyz, oılaý obrazyn, ómirin ózgertý", deıdi Tuńǵysh Prezıdent.
Elbasy muny tereń túsiný qajettigin jáne qazir ómir múldem ózgerip, qoǵamǵa Táýelsizdik jyldarynda dúnıege kelgen jańa býynnyń kelgenin naqtylaı ketti.
"Sondyqtan munyń bárin qaıta qarap, ýaqyt talabyna saı bolýymyz kerek", dedi Elbasy.