Búkil álemdi sharpyǵan COVID-19 indeti Qazaqstandy da aınalyp ótpedi. Elde karantın jarııalanyp, áli kúnge deıin mekteptegi oqý baǵdarlamalary onlaın rejimde ótýde.
Balalar buryn-sońdy bastarynan keshirmegen yńǵaısyz yrǵaqqa áli úırene alar emes. Osy oraıda, Nur-Sultan qalasyndaǵy Iýnýs Emre túrik mádenıet ortalyǵy indet jaǵdaıynda sabaqty úıden oqyp jatqan balalarǵa arnalǵan sýret baıqaýyn ótkizýdi josparlap otyr.
«Mektebimdi saǵyndym» dep atalatyn sýret jarysyna Nur-Sultan qalasynda turatyn 12-14 jas aralyǵyndaǵy oqýshylar qatysa alady. Báıgege jiberiletin sýretter A3 formatynda kez kelgen boıaýmen qabyldanady. Jumystar 25 qarashaǵa deıin Iýnýs Emre túrik mádenıet ortalyǵyna tapsyrylýy kerek.
Uıymdastyrýshylar habarlaǵandaı, qazylar tańdaıtyn alǵashqy ondyqqa kirgen shyǵarmalar ortalyqtyń áleýmettik jeli paraqshasynda 27 qarasha men 6 jeltoqsan aralyǵynda jarııalanady. Eń kóp daýys jınaǵan 3 shyǵarma ıesi jeńimpaz bolyp esepteledi. Jarys qorytyndysy 7 jeltoqsanda belgili bolmaq.
Báıge týraly tolyq aqparat afıshada kórsetilgen.