"DALA-CONSTRUCTION.KZ" JShS – qaladaǵy iri temir-beton buıymdaryn óndiretin kásiporyn. 2002 jyly qurylǵan zaýyt búginde 210 adamdy jumyspen qamtyp otyr, dep habarlaıdy Egemen.kz Shymkent qalasy ákiminiń baspasóz qyzmetine silteme jasap.
Shymkent qalasynyń ákimi Murat Áıtenov kásiporynnyń búgingi tynys-tirshiligimen tanysyp, jumys barysyn aralap kórdi.
Kásiporyn jylyna 240 myń sharshy metr temir-beton buıymdarynyń jabyn plıtasyn, 85 myń sharshy metr qurama-karkasty úıdiń temir-beton buıymdaryn, 32 myń sharshy metr óndiristik ǵımarattar daıyndaýǵa qaýqarly.
Sondaı-aq, 4,5 myń dana sý sharýashylyǵy qurylysyna arnalǵan temir-beton naýalary, 4,8 myń dana temir-beton elektr jelileriniń baǵandary, 6 myń dana metall esikter shyǵarady.
Zaýyttyń jalpy jer ýchaskesiniń aýmaǵy – 20 ga. Kásiporyn basshysynyń aıtýynsha, daıyn ónimder 100% ishki naryqqa jóneltilýde. Sondaı-aq, zamanaýı quraldarmen jabdyqtalǵan kásiporyn arnaıy jáne qosalqy 100-den astam tehnıkamen qamtylǵan.