Qazaqstan Respýblıkasynyń Aqparat jáne qoǵamdyq damý mınıstri Aıda Balaeva Almaty qalasynyń óńirlik Azamattyq forýmynyń ashylýynda sóz sóıledi. Mınıstr memlekettiń azamattyq qoǵammen ózara is-qımylynyń jańa tásilderi týraly aıtty, dep habarlaıdy Egemen.kz
Azamattyq forýmnyń plenarlyq bólimine Almaty qalasynyń ákimi Baqytjan Saǵyntaev, Almaty qalasy Qoǵamdyq keńesiniń tóraǵasy Rahman Alshanov, "Almaty qalasynyń Kásipodaqtar ortalyǵy" aýmaqtyq kásipodaqtar birlestiginiń tóraıymy Záýresh О́mirbaeva, ÚEU ókilderi qatysty.
"Kez kelgen memleket áleýmettik mańyzdy máselelerdi sheshýde senimdi seriktestikti talap etedi. Bul turǵyda qoǵamnyń túrli salalarynyń problemalaryn biletin ÚEU-ǵa úlken senim artylady. Sondyqtan ÚEU belsendiligi biz úshin árqashan mańyzdy", dep atap ótti mınıstr Aıda Balaeva.
Onyń aıtýynsha, memlekettik organdardyń ÚEU-men jobalyq ózara is-qımyl máselesi qaıta qaralýda. Iske asyrylǵan birlesken jobalardyń sapalyq kórsetkishi sandyq kórsetkishten basym bolady. Bul úshin memlekettiń 10 jylǵa arnalǵan áleýmettik baǵdarlanǵan strategııasyn ázirleý jáne bekitý týraly másele bastama boldy, onyń irgetasy adam men onyń qajettilikteri bolady.
Aqparat jáne qoǵamdyq damý mınıstri úkimettik emes uıymdardy kásibılendirýdiń mańyzdylyǵyn erekshe atap ótti.
"Qazirgi ýaqytta ÚEU-dy kásibılendirý boıynsha jumystar júrgizilýde. Atap aıtqanda, "ÚEU Akademııasy" jobasy iske asyrylýda, onyń bazasynda azamattyq sektor kóshbasshylary daıarlanyp, qoǵamdyq birlestikterdiń kásibı daǵdylary damıtyn bolady. Bul Qazaqstandaǵy ÚEU basshylary úshin qajetti quqyqtyq jáne basqarýshylyq bilimniń alǵashqy júıelendirilgen kýrsy", dep habarlady A.Balaeva.
Elimizde azamattyq sektordy odan ári damytý úshin Mınıstrlik sertıfıkattalǵan sarapshylar ınstıtýtyn qurý jáne ÚEU granttyq jobalarynyń bıýdjetin josparlaý formatyn ózgertý boıynsha jumys júrgizýde.
Esterińizge sala keteıik, "Qoǵam jáne memleket: "Birgemiz" seriktestigi men damýynyń 30 jyly" atty óńirlik azamattyq forýmdar 2020 jylǵy 23-27 qarashada ótetin Qazaqstannyń IX Azamattyq forýmy qarsańynda ótkiziledi