Qazaqstanda, onyń ishinde elorda da, sońǵy eki aı ishinde – 15 qyrkúıek pen 15 qarasha aralyǵynda emhanany erkin tańdaý naýqany júrgizildi. Nur-Sultan qalasy boıynsha qazirgi tańda 1 160 000 astam adam qala emhanalaryna tirkelgen, dep habarlaıdy Egemen.kz
Al 11 myńnan astam elorda turǵyny eshqaıda tirkelmegen, ıaǵnı densaýlyq saqtaý júıesinen tys qalyp otyr. Sondaı-aq, elorda turǵyndary arasynda medısınalyq saqtandyrylmaǵandar da bar.
"Sondyqtan bul azamattardy medısınalyq saqtandyrý júıesindegi óz mártebelerin anyqtaýǵa shaqyramyz. Turǵyndar óz mártebelerin naqtylap, emhanaǵa tirkelýleri tıis.
Medısınalyq-sanıtarııalyq kómek uıymdaryna tirkelý – bul TMKKK jáne MÁMS júıesi sheńberinde medısınalyq qyzmetterdiń barlyq túrin alý úshin qajetti shart. Úıge baryp medısınalyq kómek kórsetý kerek bolǵan jaǵdaıda qoljetimdi bolý úshin turǵylyqty jerińizge jaqyn emhanaǵa tirkelgenińiz jón", deıdi Áleýmettik medısınalyq saqtandyrý qorynyń Nur-Sultan qalasy boıynsha fılıalynyń baspasóz qyzmeti.
Esterińizge salamyz, tirkelý naýqanynan tys kez kelgen ýaqytta MSAK uıymyn birneshe jaǵdaıda aýystyrýǵa bolady: eger Siz turǵylyqty jerińizdi aýystyrǵan bolsańyz; qaladan tys jerge bir aıdan astam merzimge ketseńiz; nemese alǵash ret erkin tańdaý nemese tirkelý quqyǵyn paıdalanam dep sheshseńiz; sondaı-aq emhanaǵa sizdiń qatysýyńyzsyz tirkegen bolsa, emhanańyzdy aýystyrýyńyzǵa bolady. Sondaı-aq medısınalyq uıym qaıta uıymdastyrylǵan nemese taratylǵan, áleýmettik medısınalyq saqtandyrý qorymen shart buzylǵan jaǵdaıda, nemese sizdiń úıińizge jaqyn jerde jańa emhana ashylsa, tirkelýge bolady.
ESQ bolǵan jaǵdaıda emhanaǵa www.egov.kz elektrondyq úkimet portalynda tirkelýge bolady, ol úshin "Densaýlyq saqtaý" bóliminde "Medısınalyq-sanıtarııalyq alǵashqy kómek kórsetetin medısınalyq uıymǵa tirkelý" qyzmetin tańdaý qajet. Barlyq joldar toltyrylǵannan keıin pasıent týraly aqparat avtomatty túrde emhanaǵa túsedi. Eger barlyǵy durys toltyrylyp, oryndalsa, ótinish berýshige medısınalyq mekemeniń elektrondyq sıfrlyq qoltańbasymen rastalǵan tirkeý týraly habarlama keledi.
Sonymen qatar, MSAK uıymynda bul qyzmet zeınetkerlerge, múgedekterge, bala kezinen múgedekke zań boıynsha taǵaıyndalǵan qamqorshylarǵa, qorǵanshylarǵa nemese qamqorshylarǵa, patronat tárbıeshilerge, kolonııalarda jazasyn ótep jatqan sottalǵandarǵa, stýdentterge, sondaı-aq medresede oqıtyndarǵa, merzimdi qyzmettegi áskerı qyzmetshilerge, shet memleketterde týǵan balalarǵa, sondaı-aq senimhat boıynsha tirkelýdi resimdeıtin adamdarǵa kórsetiledi. Ol úshin erkin nysanda ótinish jazyp, jeke basyn kýálandyratyn qujatty kórsetý jetkilikti.
Densaýlyq saqtaý sýbektileriniń derekqorynda tirkelgen medısına uıymdary TMKKK jáne MÁMS boıynsha medısınalyq qyzmetter kórsete alady. Tolyq aqparatty Qordyń fms.kz saıtynyń «Emhanany tańdaý» bóliminen bile alasyz.
Aıta ketý kerek, MSAK uıymyna osy jyly tirkeý naýqany kezinde tirkelgen azamattar 2021 jyldyń 1 qańtarynan bastap TMKKK sheńberinde jáne MÁMS júıesinde osy uıymda medısınalyq kómekti ala bastaıdy.