Qazaqstandyq Astana Pro Team velokomandasynyń ataýy kelesi jyldyń 1 qańtarynan bastap Astana-Premier Tech bolyp ózgeredi. Bul týraly «Samuryq-Qazyna» AQ baspasóz qyzmeti habarlady.
«2021 jyldyń 1 qańtarynan bastap halyqaralyq naryqta 30 jyldyq tabysty jumys tájirıbesi bar kanadalyq Premier Tech kompanııasy Astana Pro Team kásibı veloklýbynyń jańa ıesi atanady. Osyǵan baılanysty klýb óz ataýyn Astana-Premier Tech dep ózgertedi», delingen habarlamada.
Buǵan deıin velokomandanyń bas seriktesi atanyp kelgen «Samuryq-Qazyna» kelesi jyldan bastap klýbty qarjylandyrýdy 50 paıyzǵa qysqartady. Dese de «Astana» UCI bekitken álemdik Gran-týr jarystaryna qatysa beredi. Esterińizge sala keteıik, qyrkúıek aıynda Qazaqstan Prezıdenti Qasym-Jomart Toqaev kásibı sport klýbtaryn memleket esebinen ustaýdyń orynsyz ekenin atap ótken bolatyn.