Kúni keshe Ulttyq kınony qoldaý memlekettik ortalyǵy jyldy qorytyndylap, ekinshi pıtchıng nátıjesi boıynsha kınoóndiriske jol tartqan jobalar jaıly habarlady.
Qazirgi kezde Kıno ortalyǵy memleket tarapynan qarjylandyrýǵa ıe bolǵan jańa kartınalardyń rejısserlerimen, prodıýserlerimen belsendi jumys istep jatyr.
Ortalyq ókilderiniń aıtýynsha, bıyl ózderiniń tarapynan tolyqmetrli debıýttik kartınalardyń shyǵarylýyna erekshe nazar aýdarylǵan. Mysaly, 2019 jyly ótken birinshi pıtchıngte osy sanattaǵy jalǵyz joba Aıjan Qasymbekovanyń «Ot» fılmi bolatyn. Bıyl jarys qorytyndysyna sáıkes bes birdeı debıýttik fılm qarjylandyrylmaq. Solaısha kıno tilin endi meńgere bastaǵan rejısserler úlken kıno jasaýdaǵy sheberlikterin kórsetýge múmkindik aldy. Tómende sol fılmder jaıynda birshama málimet keltirmekpiz.
Kıno ortalyǵy úshin mańyzdy taqyryptardyń biri – áleýmettik mańyzy bar fılmder. Bul joly pıtchıngte osy sala boıynsha Aldııar Baırakımovtiń baǵy jandy. Ol 2018 jyly Ońtústik Koreıanyń Phenchhan qalasynda ótken qysqy Paralımpıada oıyndarynyń jeńimpazy Aleksandr Kolıadınniń ǵumyryna negizdelgen «Paralımpıadashy» fılminiń túsirilimin bastap ketpek. Kólik apatynyń saldarynan oń aıaǵynan aıyrylǵan Aleksandr Phenchhanda ótken jarysta shańǵymen sekirip (1,5 km klassıkalyq sprınt ádisi), altyn medal jeńip alǵan erik-jigeri myqty qazaqstandyq azamat.
Biraz jyldan beri Aral tóńireginde izdenip, joba jasap júrgen dokýmentalıst Vıktor Vılkovıskıı «Teńizdiń oralýy» derekti fılmin túsirýge kirisip ketipti. Onyń ekologııalyq apattyń sebepteri týraly tolyq túsinik beretin kúrdeli ǵylymı-kópshilik fılminiń aýqymdy bóligi negizinen «Barsakelmes» qoryǵynda túsirilmek.
Avtorlyq fılmderge qatysty aıtatyn bolsaq, jýyrda ǵana «Alaıaqtar» serıalyn túsirip bitken Darhan Tólegenov kelesi jyldyń basynda «Aǵaıyndylar» dramasyn túsirýdi josparlap otyr. Sıýjettiń basty keıipkeri – balalar úıinen ákesin izdeý úshin ketip qalǵan Aqjol esimdi jasóspirim. Kórshisi Dımashpen tanysqannan keıin jas jigit qaraqshylyqpen aınalysady. Kisi tonap aqsha tabady. Sońyra týysymen kezdesken soń, ol óziniń týǵan aǵasynyń bar ekenin biledi. Aǵasyn taýyp alǵan soń, ekeýi birge ákesin izdeýdi bastaıdy…
«Tıýlpan» kartınasynyń jaryq juldyzy Ashat Kýchınchırekov «Baýyryna salý» fılminde qazaq dástúrlerine nazar aýdarmaq. Kartınanyń basty keıipkeri – Arman esimdi bala. Ol ájesi qaıtys bolǵannan keıin ata-anasyna oralady. Áke-sheshesinen on jyl boıy bólek turǵan balanyń olarmen qarym-qatynasy kúrdeli ekeni túsinikti. Ájesi týraly túpsiz tereń estelikter balaǵa ata-anasymen jyly qarym-qatynas ornatýǵa múmkindik bermeıdi. «Baýyryna salý» fılminde ákeler men balalar máselesi balanyń kózimen sıpattalady.
Mádı Baljanov keń aýdıtorııany birden baýrap alýǵa sheshim qabyldaǵan jalǵyz debıýtant sııaqty. Jan-Jak Annonyń «Amelı» kartınasynan shabyt alǵan rejısser «Sútti qyz» romantıkalyq komedııasyn shyǵarýdy josparlaýda. Oqıǵa basqalardyń ómirin tátti etýge tyrysyp júrgen jas kondıter Djamılıdiń aınalasynda órbıdi.
Ulttyq kınony qoldaý memlekettik ortalyǵy osy fılmderdiń tezirek jaryqqa shyǵýyna tilektes ári daryndy jas rejısserler úshin tanymaldylyqqa jol ashatyn fılmder bolsa dep úmittenedi.