Keshe Atyraý qalasynda qarashanyń 22-sinen beri 187 bylǵary qolǵap sheberiniń qatysýymen ótip jatqan bokstan Qazaqstan chempıonaty óziniń máresine jetti. Onyń qorytyndysy boıynsha Aqmola oblysynyń quramasy resmı emes esepte komandalyq birinshi orynǵa ıe boldy.
Keshe Atyraý qalasynda qarashanyń 22-sinen beri 187 bylǵary qolǵap sheberiniń qatysýymen ótip jatqan bokstan Qazaqstan chempıonaty óziniń máresine jetti. Onyń qorytyndysy boıynsha Aqmola oblysynyń quramasy resmı emes esepte komandalyq birinshi orynǵa ıe boldy.
Birinshiliktiń aqtyq aıqasyna 10 oblystyń boksshylary qatysty. Olardyń arasynda Ońtústik Qazaqstan oblysynyń bási basymdaý boldy. Biraq fınalda shaıqasqan 5 boksshynyń ekeýi ǵana jeńiske jete aldy. Munyń esesine, Aqmola oblysynyń altyn medal úshin aıqasqan 3 boksshysy da sol maqsattaryn oryndaı bildi. Aınalyp kelgende, bul kórsetkish ara salmaqty ózgertip, kókshelik jigitterdiń bas báıgeni julyp áketýine múmkindik áperdi. Sondaı-aq, fınalǵa 3 sportshysyn salǵan Astana quramasy nátıjesinde birde-bir altyn medal ala almady. Osynyń ózi onyń aldyna Almaty qalasy men Jambyl oblysynyń jasaqtary túsip ketýine jol ashyp berdi.
Aıta ketý kerek, taıaýda Almatyda ótken álem chempıonatynda júldeli oryn alǵan qazaqstandyq boksshylardyń birde-biri bul birinshilikke qatysqan joq. Onyń esesine, Azııada top jarǵan Temirtas Júsipov pen Anton Pınchýk Kaspıı jaǵasyndaǵy qalada ótken básekeniń kórigin qyzdyrýǵa atsalysty. Al chempıonatta jastar kóbirek boı kórsetti. Bul úshin bıylǵy aqpan aıynda Oral qalasynda ótken elimizdiń jastar arasyndaǵy chempıonatyna qatysqan 60-qa jýyq jas boksshynyń osynda kelgenin aıtsaq ta jetkilikti. Bulardyń arasynda sol birinshiliktiń aqtyq synynda óner kórsetken 11 balǵyn atlet boldy. Solardyń arasynan tek tarazdyq Aıtjan Shileev qana qola medalge qol jetkize aldy.
Chempıonat barysynda sensasııalar da az bolǵan joq. Sonyń oraıynda ózinen buryn deńgeıi tómen sanalyp kelgen qarsylastaryna jol berip alǵan Ǵanı Jaılaýov, Manat О́mirzaqov, Almat Serimov, Ilııas Súleımenov, Rýstam Svaev syndy boksshylar boldy.
Sonymen, Qazaqstannyń 2013 jylǵy chempıony ataǵyna myna boksshylar qol jetkizdi: 49 kg – Temirtas Júsipov (Aqmola), 52 kg – Ádilet Qurmetov (Qaraǵandy), 56 kg – Erjan Ordabaev (Atyraý), 60 kg – Zákir Safıýllın (Ońtústik Qazaqstan), 64 kg – Almasbek Álibekov (Ońtústik Qazaqstan), 69 kg – Saǵadat Rahmanqulov (Jambyl), 75 kg – Saparbaı Aıdarov (Almaty), 81 kg – Nurdáýlet Jarmanov (Aqmola), 91 kg –Anton Pınchýk (Qostanaı), +91 kg – Jan Kosobýskıı (Aqmola).
Bul boksshylar endi Qazaqstan quramasy sapyna alynady.
Joldasbek ShО́PEǴUL,
«Egemen Qazaqstan».
ATYRAÝ.