26 qarashada keshki saǵat 20.00 shamasynda Almaty oblysy TJD kezekshi pýltine Taldyqorǵan qalasynyń Erkin aýyly, Qazaqstan kóshesiniń boıyndaǵy jeke turǵyn úılerdiń birinde shaǵyn gaz ballony (syıymdylyǵy 5 lıtr) jaryldy degen habarlama kelip tústi. Bul týraly QR TJM resmı ókili Talǵat Ýálı habarlady.
Jarylys saldarynan órt shyqqan joq. Alaıda turǵyn úıdiń qabyrǵalary men shatyry qırady.
Jarylys saldarynan 8 adam, onyń ishinde 3 bala zardap shekti. Olardyń barlyǵy medısınalyq mekemelerge jetkizildi.
Aldyn ala boljam boıynsha, turmystyq gaz ballonyn jylytý úshin peshtiń janyna qoıý jarylysqa sebep bolǵan.
Oqıǵa ornynda Almaty oblysy TJD 28 qyzmetkeri, 8 tehnıkasy, 8 jedel járdem brıgadasy, polısııa, gaz qyzmeti jáne jergilikti atqarýshy organdardyń qyzmetkerleri jumys istedi. Sonymen qatar zardap shegýshilerdiń týystaryna psıhologııalyq kómek kórsetý úshin Almaty oblysy TJD-nyń eki psıholog mamany jumyldyryldy.
QR TJM azamattardan gaz ballondaryn paıdalaný jáne qoldaný kezinde saqtyq sharalaryn qatań saqtaýdy suraıdy.