Elordadaǵy Ulttyq akademııalyq kitaphanada ótken «Kitaphanadaǵy poezııa túni» áleýmettik-mádenı aksııasynyń «Jaýhar jyr planetasyna túngi saıahat» atty is-sharasy «Kitaphana shaqyrady, poezııa shaqyrady» atty lazerlik shoýdan bastaldy.
Elordadaǵy Ulttyq akademııalyq kitaphanada ótken «Kitaphanadaǵy poezııa túni» áleýmettik-mádenı aksııasynyń «Jaýhar jyr planetasyna túngi saıahat» atty is-sharasy «Kitaphana shaqyrady, poezııa shaqyrady» atty lazerlik shoýdan bastaldy.
Kitap oqýdy nasıhattaý, adamgershilik tárbıe men rýhanı baılyq, álemdi taný men bilimge jeteleıtin orta – kitaphanaǵa kelýdi qoǵamnyń rýhanı dástúrine aınaldyrýdy maqsat etken basqosýǵa elordanyń shyǵarmashylyq jáne zııaly qaýym, ulttyq etnomádenı birlestikterdiń ókilderi, sonymen qatar, jas aqyndar, oqytýshylar, kitaphanashylar men stýdentter qatysty.
Shara barysynda Mádenıet jáne aqparat mınıstrligi Mádenıet komıteti tarıhı-mádenı muralar basqarmasynyń basshysy Bazarbaı Altaev ótip jatqan ıgilikti istiń mán-maǵynasyna toqtalyp, kitaphanaǵa Germanııada shyqqan kórme katalogy kitabynyń eki tomdyǵyn tabys etse, bul sııapatty qabyl alǵan Ulttyq akademııalyq kitaphananyń bas dırektory, jazýshy Álibek Asqar mundaı bir mezgilde birneshe is-sharany qatar qamtyǵan basqosýdyń Astanada tuńǵysh ret ótkizilip otyrǵanyn aıtyp, jınalǵan kópshilikke rızashylyǵyn bildirdi.
Bıylǵy jyl «Bir el – bir kitap» aksııasy aıasynda Farıza Ońǵarsynovanyń týyndylaryn qamtyǵandyqtan kitaphanadaǵy poezııa túniniń jyr bólimi aqyn shyǵarmashylyǵyna arnaldy. «Shańyraq» etnografııalyq zalynda Farıza Ońǵarsynovanyń týǵan jeri «Manash» aýyly ornyqsa, «Mýzykalyq meımanjaıda» «Júrekterge bir jylý ákeleıin...» atty jyr keshi ótti. Kesh kúı atasy Qurmanǵazynyń «Adaı» kúıimen ashylyp, aqyndar Marjan Ershý, Quralaı Jumaqanova men Gúlsara Shalqar aqyn apalarynyń óleńderin oqyp, ánshi Klara Tólenbaeva Farıza Ońǵarsynovanyń sózine jazylǵan Tabyldy Dosymovtyń «Qyz muńy» ánin tógilte shyrqady. Fılologııa ǵylymdarynyń doktory Janat Áskerbekqyzy aqyn apasynyń óleń sıqyrynyń syrly álemin baıandap, «Kaleıdoskop» atty Farıza Ońǵarsynova týraly óleńder jınaǵynyń qurastyrýshysy, aqyn Vladımır Petrov arnaý óleńin oqyp, jas aqyndar Olga Posohova men Qymbat Buharbaeva apalarynyń óleńderin orys tilinde oqydy. Aqyn apamyzdyń lırıkasyna arnalyp «Tartynbaı sóıler asylmyn...» ádebı saıysy men «Qyrmyzy boıaýlar sóılesin...» taqyrybynda jas sýretshiler alleıasy jasaqtalyp, «Kógildir» zalda «Aqberenniń aqyndyq álemi» atty «Daryn» jáne «Serper» jastar syılyǵynyń ıegeri Aqberen Elgezekpen suhbat keshi bolyp ótti. Sondaı-aq, jınalǵan kópshilik osyndaǵy kitaphana qorynan alynǵan eń úlken, eń kishkentaı, eń sırek jáne eń jańa kitap kórmesin, «Meniń qoltańbam» atty múmkindigi shekteýli oqyrmandardyń ózderi qoldan jasaǵan buıymdardyń kórmesin, «Dombyra party» keshi men «Ádebı karaoke» mýzykalyq sherýin tamashalap, «East-West» kvartalynda Úndistan, Fransııa men Koreıa elderiniń salt-dástúrleri men mádenıeti týraly keń maǵlumattar ala bildi. Al «Kórkem ádebıet abonomenti» zalynda ártúrli jastaǵy oqyrmandar qatysatyn «Ádebıet álemi» atty júzdesýde eń kóp oqıtyn oqyrmandy marapattaý rásimi bolyp, saıttarda izdeý júıesinde berilgen resýrstardy jyldam tapqan eń tapqyr oqyrmandarǵa júldeler tabys etildi.
Berik SADYR,
«Egemen Qazaqstan».