Senat Tóraǵasy Máýlen Áshimbaev "Nursultan Nazarbaev: jahandyq aýqymdaǵy saıasatker" taqyrybyna arnalǵan halyqaralyq konferensııaǵa qatysty, dep habarlaıdy Egemen.kz.
Is-shara barysynda Qazaqstan Respýblıkasynyń Tuńǵysh Prezıdenti – Elbasynyń táýelsiz Qazaqstan memleketiniń negizin qalaýshy retindegi róli men halyqaralyq bastamalary jaıynda sóz boldy. Jıynǵa elimizdiń memleket jáne qoǵam qaıratkerlerimen birge álemdik deńgeıdegi belgili saıasatkerler de qatysty.
О́z sózinde Máýlen Áshimbaev Nursultan Nazarbaevtyń memleket qalyptastyrý isindegi mańyzdy sheshimderine nazar aýdardy. Sondaı-aq, Senat Tóraǵasy Táýelsizdiktiń alǵashqy jyldarynda eldegi ishki ahýaldyń kúrdeli bolǵanyn, Elbasy sol tyǵyryqtan shyǵar joldy taýyp qana qoımaı, ózine júktelgen tarıhı mıssııany artyǵymen oryndaǵanyn atap ótti.
«Elbasy táýelsiz Qazaqstan memleketin quryp, egemendiktiń eń basty tuǵyrlaryn tas-túıin bekitip berdi. Eń aldymen, shekaradaı kúrdeli másele kemeńgerlikpen sheshilip, halyqaralyq qujattarmen birjola shegendeldi. Shekara máselesi túpkilikti sheshilmese memlekettiń táýelsizdigi baıansyz, bolashaǵy bulyńǵyr bolady. Ony búginde bárimiz kórip otyrmyz. Sondyqtan Nursultan Ábishuly bul iste daý-damaıǵa emes, salıqaly dıplomatııaǵa arqa súıedi», – dedi Máýlen Áshimbaev.
Sonymen qatar Senat Tóraǵasy Elbasynyń memlekettik basqarý ınstıtýttaryn qalyptastyrý jolyndaǵy erik-jigerine toqtaldy.
«El damýyna tyń serpin bergen ata zańymyz – Konstıtýsııamyz qabyldandy. Soǵan sáıkes, bılik tarmaqtary qalyptasyp, qos palataly kásibı Parlament, Úkimet, táýelsiz sot júıesi quryldy. Jergilikti ákimdikterdiń jumysy jolǵa qoıyldy. Sol arqyly memlekettik basqarý ınstıtýttary júıelenip, árqaısysynyń maqsat-mindetteri naqtylandy», – degen Senat Tóraǵasy Tuńǵysh Prezıdentimizdiń qajyr-qaıratynyń arqasynda Qarýly Kúshterimiz qurylǵanyn, ekonomıka salasynda keshendi reformalar iske asyrylyp, asa mańyzdy jáne tarıhı sheshimder qabyldanǵanyn aıtty.
Elbasynyń kemeńger sheshimderiniń biri astanany Arqa tósine kóshirý ekeni sózsiz. Sol kezdegi ekonomıkalyq qıyndyqtarǵa qaramastan qabyldanǵan bul sheshim naǵyz strategııalyq qadam boldy. Máýlen Áshimbaev bul batyl sheshimdi táýelsizdiktiń bir tuǵyry dep atady.
«Nursultan Nazarbaev astanany kóshirý arqyly Qazaqtyń jańa zamandaǵy uly kóshin bastap berdi. Rasymen, elordanyń ósip-órkendeýi tutas Qazaqstannyń damýyna dańǵyl jol ashty. Otanymyzdyń abyroıyn asqaqtatyp, bedelin ósirdi, búkil qazaqstandyqtardy jańa maqsat-murattarǵa jeteledi. Búginde elordamyz elimizdiń júregi, Táýelsizdigimizdiń tiregi, memlekettik damýdyń naǵyz temirqazyǵyna aınaldy», – dedi Senat Tóraǵasy.
Sondaı-aq, ol Elbasynyń Túrkistan oblysyn quryp, Túrkistan shaharyna jańa mártebe berý týraly sheshiminiń mańyzy zor ekenin aıtty.
«Tarıhty tarlan tulǵalar jasaıdy» degen sóz bar. Shyn máninde, Elbasynyń eldik múdde jolynda qabyldaǵan ár sheshimi ult tarıhynyń jańa taraýy bolyp jazylady. Solardyń ishinde Túrkistanǵa qatysty sheshimniń orny bólek. Túrkistandy túletý – ótkennen ónege ala otyryp, kemel keleshekke umtylýdyń ozyq úlgisi», – deı kele Máýlen Áshimbaev osy joldaǵy «Mádenı mura», «Rýhanı jańǵyrý» baǵdarlamalarynyń da aıryqsha mánge ıe ekenin sóz etti.
«Tarıhtan taǵylym alý keıin sheginý emes, ol – ulttyq kodty saqtaýdyń jarqyn kórinisi. Rasynda, ulttyq kodsyz memleket bolmaıdy. Sol sebepti, bul salada Elbasy ulttyq tutastyqtyń kepili retinde batyl sheshimder qabyldaýdan qaımyqqan joq», – dedi Senat Tóraǵasy.
Máýlen Áshimbaev Nursultan Ábishulynyń jasampazdyq pen jańashyldyqty toǵystarǵan osyndaı strategııalyq qadamdaryn elimizdiń syrtqy saıasatynan da baıqaýǵa bolatynyn aıtty. Bul rette Senat Tóraǵasy Elbasynyń halyqaralyq qaýipsizdikti qamtamasyz etý jolyndaǵy ıgi bastamalaryna toqtalyp ótti. Onyń aıtýynsha, Tuńǵysh Prezıdentimiz syrtqy saıasatta bilekke emes, bilimge, aqyl-parasatqa, dıalog pen ózara senimge taban tireı otyryp, batyl sheshimder qabyldady. О́rkenıetaralyq jáne dinaralyq kelisimdi nyǵaıtý arqyly Qazaqstan jahandyq qaýipsizdikke óz úlesin qosty.
Sondaı-aq, Máýlen Áshimbaev Elbasynyń Eýrazııalyq ıntegrasııany damytýǵa qatysty jańashyl qadamdaryna toqtaldy. Senat Tóraǵasynyń sózine súıensek, Tuńǵysh Prezıdentimizdiń álemdik yntymaqtastyqty saqtaý jolyndaǵy tyń bastamalary ómirshen jáne olar HHI ǵasyrda jahandyq qaýipsizdikti qamtamasyz etýdiń berik negizi retinde qyzmet ete beredi.
Halyqaralyq konferensııaǵa Qazaqstan Respýblıkasynyń Memlekettik hatshysy Qyrymbek Kósherbaev, Qazaqstan Respýblıkasy Konstıtýsııalyq Keńesiniń Tóraǵasy Qaırat Mámı, Azııadaǵy ózara is-qımyl jáne senim sharalary jónindegi keńes hatshylyǵynyń (AО́SShK) Atqarýshy dırektory Qaırat Sarybaı, Qazaqstan Respýblıkasy Parlamenti Senaty janyndaǵy Senatorlar keńesi Tóraǵasynyń orynbasary Birǵanym Áıtimova, Nazarbaev Ýnıversıtetiniń Prezıdenti Shıgeo Katsý, Qazaqstan Respýblıkasynyń qoǵam qaıratkeri Ermuhamet Ertisbaev qatysty. Sondaı-aq, is-shara barysynda birqatar sheteldik qatysýshylardyń beınebaıandamalary tyńdaldy. Olardyń qatarynda Birikken Ulttar Uıymynyń burynǵy bas hatshysy, Jahandyq Jasyl ósim ınstıtýtynyń qazirgi prezıdenti Pan Gı Mýn, Eýropalyq qaıta qurý jáne damý bankiniń (EQDB) birinshi prezıdenti Jak Attalı, Ulybrıtanııanyń burynǵy premer-mınıstri Tonı Bler, Túrkııanyń burynǵy prezıdenti Abdolla Gúl, AQSh-tyń burynǵy memlekettik hatshysy Kondolıza Raıs jáne Ujymdyq qaýipsizdik týraly shart uıymynyń (UQShU) Bas hatshysy Stanıslav Zas bar.