Qazaqstandyq ánshi Ásel Sádýaqasovanyń burynǵy jigiti Asyljan Raqyshevqa izdeý jarııalandy. Bul týraly Tengrinews.kz tilshisi habarlady.
Ishki ister mınıstrliginiń tergeý komıteti A.Raqyshevqa qatysty qylmystyq is qozǵady. Oǵan «alaıaqtyq» jáne «qujatty qoldan jasaý» degen baptar boıynsha aıyp taǵylǵan. Almaty qalasy Almaly aýdandyq soty A.Raqyshevti qamaýǵa alý jóninde sheshim de qabyldapty. Biraq, ony qolǵa túsirý ázirge múmkin bolmaı tur.
Zardap shegýshi jaqtyń aıtýyna júginsek, A.Raqyshev 2011 jyly ánshiniń anasy Baqyt Jantóreevanyń senimine kirip, páterin kepildikke qoıýǵa kóndiredi. Ol kezekti bir tenderge qatysýy úshin óz kompanııasynyń aktıvin úlkeıtip kórsetip, ánshi anasynyń ıeligindegi eki páterdi kepilge qoıý qajet ekenin aıtyp, tenderdi utyp alǵannan keıin páterlerdi qaıtaratynyna ýáde beredi. О́z sóziniń shyndyq ekenin dáleldeý maqsatynda kelissózdi kórsetedi. Osydan keıin Baqyt Jantóreeva ózine usynylǵan qaǵazdarǵa qol qoıyp bergen. Keıin anyqtalǵandaı, bul páterlerdi satatyn jónindegi qujattar bolyp shyqty. Zardap shegýshi kózine ota jasatýy sebepti sol kezde kelissózdiń mátinin oqymaǵanyn aıtady.
Tergeý barysynda Jantóreevanyń satylǵan páterlerdiń aqshasyn almaǵany, páterlerdi satý oıynda bolmaǵany anyqtaldy. Jalpy, qazir A.Raqyshev basqa da alaıaqtyq áreketterge barǵan degen derekter aıtylyp júr. Al munyń aldynda onyń advokaty Tatıana Samoılenko ánshi men anasy óz erikterimen páterdi satyp, jala jaýyp jatyr degen bolatyn. Biraq, sońynan aıtqany dáleldengen joq.
Baqytbek Keneshuly.
Derekkóz:Tengrinews.kz.