Ulttyq kınony qoldaý memlekettik ortalyǵynyń baspasóz qyzmeti ekinshi pıtchıngtiń qorytyndysy boıynsha óndiriske joldama alǵan kommersııalyq fılmdermen tanystyrdy.
Atap aıtqanda, keler jyly debıýttik, anımasııalyq, qysqa metrli, avtorlyq kartınalar men kommersııalyq áleýeti joǵary birqatar joba fılmge aınalyp, kórermenge jol tartpaq.
Bolashaq otandyq blokbasterlerdiń tizbegin qazaqstandyq eń tabysty rejısserlerdiń biri Asqar Bısembın bastaıdy. Ol kıno ortalyǵymen seriktestik ornata otyryp, «Bılet ız raıa» komedııalyq melodramasyn jaryqqa shyǵarmaqshy. Avtor bul jobanyń paıda bolýyna óz qyzy Kamıllanyń suraǵy sebep bolǵanyn atap ótken. «Ákeńiz tiri bolǵanda onymen qandaı syryńyzdy bóliser edińiz?», degen saýal ony oılandyryp tastaıdy.
Lırıkaǵa toly taǵy bir kıno – Asqar Uzabaevtyń «Adam jáne Alma» melodramasy bolmaq.
Bas keıipker Adam qaryzyn óteý úshin jer satý týraly sheshim qabyldaıdy. Sol sheshimimen ákesiniń 30 jyl boıy kútip-baptaǵan alma baǵynyń taǵdyryn bir saǵattyń ishinde kúl-talqan qylady. Jerdi satyp alýshy – iri qurylys kompanııasy baqty saqtap qalǵysy kelmeıdi. Onyń ornyna shıpajaı salý nıetimen baqty shaýyp tastaıdy. Ataqty Almaty almalarynyń tarıhynan aqsha qymbatyraq bolyp shyǵady. Seleksıonerlerdiń kópjyldyq eńbegi baqsha qyzmetkerlerinen basqa eshkimge kerek emes eken. Biraq olar jer ıesine qarsy kele almaıdy. Osy kezde keıipkerdiń basty transformasııasy oryn alady. Adam óz ákesiniń isin túbegeıli joıyp jibere jazdaǵanyn túsinip, jańa baq salyp, biregeı alma surybyn ósirýdi qolǵa aldy. Kartınanyń túsirilimi Almaty oblysynda ótedi, al basty rólderdi Berik Aıtjanov pen Almıra Tursyn somdaıdy.
Rejısser Aıdyn Samahannyń «Dos-Muqasan» fılmi de kórermen qyzyǵýshylyǵyn týdyratyny sózsiz. О́ıtkeni ánderi urpaqtan-urpaqqa jetken el tarıhyndaǵy eń tanymal mýzykalyq ujymnyń qalyptasýy jaıly baıandaıtyn fılmde mıýzıkl elementteri bar.
Qoıýshy-rejısser bıografııalyq kınony ózgeshe tásilmen túsirýdi jáne «Dos-Muqasannyń» qaharmandaryn kartınanyń sıýjetine sheberlikpen úılestiremin dep ýáde etken.