Jyl basynan beri kámeletke tolmaǵandar arasyndaǵy qylmystar 29,9%-ǵa tómendegen, dep habarlaıdy Egemen.kz.
Quqyq buzýshylyqtardyń aldyn-alý úshin Túrkistan oblysynda birqatar mańyzdy is-sharalar atqaryldy. Osy jáne ózge de ózekti máseleler oblys ákimi О́mirzaq Shókeevtiń tóraǵalyǵymen ótken Túrkistan oblysy ákimdigi janyndaǵy quqyq buzýshylyq profılaktıkasy jónindegi vedomstvoaralyq komıssııasy májilisinde qaraldy.
Belgili bolǵandaı, bıylǵy jyldyń 10 aıynyń ishinde atqarylǵan is-sharalar nátıjesinde quqyq buzýshylyqqa beıim kámeletke tolmaǵandar jáne bala tárbıesine nemquraıdy qaraıtyn 332 qolaısyz otbasy Ishki ister organynyń esebine alyndy.
Qoǵamdyq tártip pen qoǵamdyq qaýipsizdikti qamtamasyz etý maqsatynda bıylǵy jyldyń 10 aıynda kópshilik oryndardy lastaǵan, belgilenbegen oryndarda temeki tartqan, spırttik ishimdik ishken, usaq buzaqylyqtar jasaǵan azamattarǵa 6799 ákimshilik hattama toltyrylǵan. Jumys kúsheıtilip, kórsetkish ótken jylmen salystyrǵanda 3 ese artqan.
Túrkistan oblysynda qoǵamdyq oryndardy, kóshelerdi jáne basqa da qylmys kóp oryn alatyn jerlerdi sapaly jáne zamanaýı beınebaqylaý júıelerimen jabdyqtaý jumystary jalǵasady.
Qoǵamdyq rezonans týdyratyn alaıaqtyq qylmys túrleriniń biri – qarjy pıramıdalaryn qurý. Ishki ister departamentiniń málimetine sáıkes, bıyl oblys aýmaǵynda qarjy pıramıdasyn qurýdyń 3 deregi anyqtalǵan. Atap aıtqanda, shamamen 1947 salymshysy bar «Gold Company LTD» (shamamen 597 mln tengege shyǵyn keltirgen) jáne shamamen 650 salymshysy bar «Mıllenıým» (shamamen 1,755 mlrd tengege shyǵyn keltirgen) qarjy pıramıda qurýshylary quryqtalyp, qylmystyq isteri sotqa joldanǵan. Qazirgi tańda osy tárizdes «Indigo-24 Evolution» qarjy pıramıdasyn qurýshylar anyqtalyp, sotqa deıingi tergep tekserý jumystary júrgizilýde.