Sońǵy ýaqytta ekinshi deńgeıli bankter shaǵyn bıznes ıelerine kóbirek nesıe usyna bastaǵan. Bul týraly Ulttyq Bank derekterinde aıtylady, dep habarlaıdy Egemen.kz
Basty qarjylyq qadaǵalaýshynyń málimetinshe, 2020 jyldyń qarasha aıynyń basynda atalǵan sektorǵa bankter 2,3 trln teńge bergen. Al byltyr shaǵyn bıznes 2,1 trln teńge alǵan edi. Bir jyl ishinde bólingen soma 9,5 paıyzǵa nemese 200 mlrd teńgege ósip tur. Zańdy tulǵalar 1,9 trln teńge alsa, jeke tulǵalar 354,5 mlrd teńge nesıe alǵan.
Aımaqtar arasynda Almaty kósh bastap tur. Almatydaǵy shaǵyn bızneske bıyl 1,35 trln teńge bólingen (bir jylda 17,4 paıyz ósim). Odan keıin Nur-Sultan (265 mlrd teńge) jáne Qaraǵandy oblystary (80 mlrd teńge) tur. Shyǵys Qazaqstan oblysy men Shymkent qalasy da 70 mlrd teńge mejesin eńsergen.
Oblystardyń ishinde az qarajat alǵan ólke – Qyzylorda oblysy (28,3 mlrd teńge), Almaty oblysy (24 mlrd teńge). Al eń az soma endi jańaryp, túlep kele jatqan Túrkistan oblysyna tıesili. Atalǵan ólkedegi shaǵyn bıznes kásiporyndary 5,7 mlrd teńgeni qanaǵat tutqan.
Memleket shaǵyn jáne orta bıznesti 2022 jylǵa deıin ujymdyq tabys salyǵynan, jeke tabys salyǵynan, áleýmettik jáne biryńǵaı jer salyǵynan bosatqan edi.
Ulttyq statıstıka bıýrosynyń aqparatyna súıensek, 2019 jyldyń aıaǵyndaǵy derek boıynsha elimizde 439 839 kompanııa tirkelgen. Sonyń 431 044-i shaǵyn kásipkerlik nysandary eken. Osynyń ózi-aq shaǵyn kásipkerliktiń otandyq bızneste qanshalyqty úlesi joǵary ekenin ańǵartsa kerek.
Keler jyldyń basynan bastap ekinshi deńgeıli bankter jáne "Agrarlyq nesıe korporasııasy" arqyly jeńildetilgen nesıe berile bastaıdy. Orta jáne shaǵyn bıznes sýbektileri úshin shekti mólsher – 3 mlrd teńge bolsa, jeke kásipker retinde tirkelgender úshin 50 mln teńgeden aspaýy tıis. Bólingen qarajat naýryz aıynyń sońyna deıin ıgerilýi tıis. Bul da shaǵyn kásipkerlikke beriletin nesıe kólemin arttyra túseri sózsiz. Ony bıznes ıeleri qanshalyqty qajetine jaratady, jeńildetilgen nesıe tıimdi boldy ma, joq pa, ol kelesi materıaldyń júgi bolmaq.