Úkimet otyrysynda Qazaqstannyń ulttyq tólem júıesine kóshetin merzimi belgili boldy, dep jazady Egemen.kz.
Ulttyq Bankiniń tóraǵasy Erbolat Dosaev ulttyq tólem júıesin damytý baǵdarlamasy 2025 jylǵa deıin qalaı júzege asyrylatynyn aıtty. Dosaevtyń aıtýynsha, Memleket basshysynyń 30 qarashadaǵy tapsyrmasyna sáıkes Ulttyq Bank Qazaqstan Respýblıkasynyń ulttyq tólem júıesin damytýdyń 2025 jylǵa deıingi baǵdarlamasyn qabyldady.
«2021 jyly birinshi kezeńde jedel tólem júıesin damytý jáne bankaralyq tólem kartochkalary júıesiniń qurylysy júzege asyrylady. 2022-2023 jyldary jańa qyzmetterdi qosýǵa basa nazar aýdarylatyn bolady», dedi ol.
Osylaısha, ISO 20022 qarjylyq habarlamalarynyń halyqaralyq standartynyń formatyna kóshý, qashyqtyqtan sáıkestendirý qyzmetin damytý, Open API jáne Open Banking-ke qoıylatyn talaptardy tujyrymdaý, qarjy naryǵyndaǵy ınnovasııalardy qoldaýdyń normatıvtik-quqyqtyq bazasyn jetildirý, EAEO men sıfrlyq valıýtadaǵy úılestirý máselelerine erekshe nazar aýdarylatyn bolady.
2024-2025 jyldary ulttyq tólem ınfraqurylymyn jáne jańa qyzmetterdi damytý jumystary jalǵasady. Baǵdarlamaǵa engizilgen is-sharalardyń sátti júzege asyrylýy qolma-qol aqshasyz tólemder shyǵyndarynyń 2 esege tómendeýine, tólemderdi el ishinde eki kúnnen bir mınýtqa deıin jedeldetýge ákeledi.
Qolma-qol aqshasyz tólemderdi qoldaný aıasy keńeıedi. Sondaı-aq ulttyq tólem júıesi sheteldik operatorlarǵa táýeldilikti joıady, dep túıindedi Ulttyq bank basshysy.