«Bóbek» Ulttyq ǵylymı-praktıkalyq bilim berý jáne saýyqtyrý ortalyǵy ZOOM platformasynda «Bári súıispenshilikten bastalady!» taqyrybynda alǵashqy qazaqstandyq ata-analar oqýlaryn ótkizdi, dep habarlaıdy Egemen.kz
Atalǵan mańyzdy sharaǵa bilim jáne ǵylym mınıstrligi jáne aımaqtyq bilim basqarmasynyń ókilderi, sheteldik qonaqtar, ǵalymdar, mektepke deıingi jáne orta bilim berý mekemeleriniń, TjKB jáne joǵary oqý oryndarynyń basshylary men ózin-ózi taný pániniń muǵalimderi jáne ata-analar qatysty.
Qatysýshylar nazaryna «О́zin-ózi taný» rýhanı-adamgershilik baǵdarlamasynyń avtory Sara Nazarbaevanyń beıne dárisi usynyldy.
Qatysýshylar balalar ómiri men kúndelikti minez-qulqyna qatysty ózindik oılary, tájirıbelerimen bólisti.
Psıhologııa ǵylymdarynyń kandıdaty Alekseı Babaıans óz baıandamasynda balalardyń keıde eresekterge nelikten baǵynbaı, tilazar bolyp ketý sebepterine toqtalyp ótti. Al «Bóbek» ortalyǵynyń bas dırektory Elena Sákenova «Otbasy men mektep: yntymaqtastyq shegi» taqyrybyn jan-jaqty ashyp berdi.
– Mektep pen otbasy qarym-qatynasy árkez ózekti kúıinde qala beredi. Ári qazirgideı qashyqtan oqý formatynda oqýshy men pedagog jáne otbasy arasyndaǵy baılanys róli tipti kúsheıe tústi. Biz bárimiz – ata-ana jáne ustazdar balalarymyzdyń baqytty bolýyn qalaımyz. Bul yqylas bizdi mynadaı máńgilik suraqtarǵa eriksiz jetelep alyp keledi: Adamnyń shynaıy baqyty nede? Mahabbat syılaı alý – baqyt pa? Balanyń baqytty bolýy úshin ne isteý kerek? Ásilinde, balanyń ómiri eki álemdi jalǵap turady: otbasy álemi jáne mektep álemi. Sondyqtan mektep pen otbasy yntymaqtastaǵy biz mán berýge tıisti asa mańyzdy faktor. Negizi balanyń alǵashqy ustazy – ata-ana. Balalyq shaq – adam ómirindegi mańyzdy kezeń. Ol eresektik ómirge daıarlyq emes, ol naǵyz shynaıy, qaıtalanbas ýaqyt. Sol bala kezinde kim oǵan aqyl berdi, kim ony jeteledi, qandaı deńgeıge baǵyttady, mine osydan kelip balanyń keıingi dárejesi men ómir joly qalyptasady, dep atap ótti Elena Sákenova.
Ortalyq quramyndaǵy Adamnyń úılesimdi damýy ınstıtýtynyń dırektory Irına Kalacheva «О́zin-ózi taný sabaǵyndaǵy sanaly ata-analyq tárbıe» taqyrybynda sóz sóıledi.
Alǵash ret qolǵa alynyp otyrǵan irgeli bastamanyń qatysýshylary otbasy men balalyq shaq salasyndaǵy kásibı yntymaqtastyq ári qaraı keńeıip, nyǵaıa túserine senim bildirdi.
ALMATY