Batys Qazaqstan oblysynda jeltoqsan aıynda 29 oqýshydan indet shyǵyp, bes mektep karantınge jabyldy, dep habarlaıdy Egemen.kz
BQO sanıtarlyq-epıdemıologııalyq baqylaý departamenti basshysynyń orynbasary Nurlybek Mustaevtyń óńirlik kommýnıkasııalar qyzmeti alańynda ótken brıfıngide málim etkenindeı, olardyń 12-sinde aýrý belgileri bolǵan, qalǵan 17-sinde sımptomsyz ótýde. Koronavırýs bes mekteptiń 8 synybynda anyqtalýyna baılanysty naýqastarmen qarym-qatynasta bolǵan oqýshylar men muǵalimder úılerinde oqshaýlandy. Oral qalasy men aýdandardyń bas sanıtar dárigerleriniń qaýlysyna sáıkes bes mektep karantınge jabyldy. Oqýshylar indetti otbasy músheleri men týysqandarynan juqtyrǵan. Balabaqsha mekemelerinde jeltoqsan aıynda kovıd tirkelgen joq. Sondaı-aq óńirdegi medısınalyq mekemeler de shtattyq rejımde jumys jasaýda. Nurlybek Ermekulynyń aıtýynsha, oblysta 1 jeltoqsannan beri barlyǵy 370 adamnyń aýyrǵany tirkelse, sonyń 215-i nemese 58,1 paıyzy Oral qalasynyń úlesine tıedi. Sol sekildi Bórli aýdanynda – 54, Báıterekte – 49, Aqjaıyqta – 10, Terektide – 7, Tasqalada – 6, Jańaqala men Bókeı ordasynda – 5, Shyńǵyrlaýda – 4, Syrymda 1 adam syrqattanǵan. Jánibek pen Qaratóbe aýdandarynda bul aıda indet tirkelgen joq. Oblys boıynsha jalpy indet juqtyrǵandar sany 8447-ge jetip, sonyń 7505-i saýyǵyp shyqsa, 144-i kóz jumdy.