El Prezıdenti Qasym-Jomart Toqaevtyń «Halyq únine qulaq asatyn memleket» tujyrymdamasyn júzege asyrý maqsatynda Almaty oblysynyń Talǵar aýdanynda servıstik ákimdik ashyldy. Bul - Almaty oblysy boıynsha ashylyp otyrǵan 20-shy servıstik ákimdik. Endi aýdan turǵyndary ár bólimderdi izdemeı-aq qajetti qyzmetterdi bir ǵımaratta ala alady, dep habarlaıdy Egemen.kz Almaty oblysy ákiminiń baspasóz qyzmetine silteme jasap.
Servıstik ákimdiktiń ashylýyna QR Sybaılas jemqorlyqqa qarsy is-qımyl agenttiginiń Almaty oblysy boıynsha departamentiniń basshysy Ernar Maqajanov arnaıy qatysyp, jasalǵan múmkindiktermen tanysyp qaıtty. «Open space» qaǵıdatymen jumys isteıtin ortalyqta 9 mekeme turǵyndarǵa jyljymaıtyn múlik rásimdeý, qurlysqa ruqsat alý, áleýmettik tólemderdi taǵaıyndaý, elektrondyq sıfrlyq qoltańba ashtyrý, aýyl sharýashylyǵy men jer qatynastary jáne basqa da salalar boıynsha jalpy sany 48 memlekettik qyzmet túrin kórsetedi. Munda kútý zaly men balalarǵa arnalǵan shaǵyn oıyn alańy bar. Qazirdiń ózinde qyzý jumysyn bastaǵan ortalyqqa kelýshi turǵyndar mundaǵy elektrondy kezektiń, qajetti qyzmetti bir jerge shoǵyrlandyrýdyń qolaıly ekenin aıtýda. Ortalyq qyzmet alýshylardyń ýaqytyn, kúsh-jigerin, qarjysyn únemdeýge múmkindik beredi.
QR Sybaılas jemqorlyqqa qarsy is-qımyl agenttiginiń Almaty oblysy boıynsha departamentiniń basshysy Ernar Maqajanov nysannyń ashylýy kezinde:
- Bul – Almaty oblysynda ashylyp otyrǵan 20-shy servıstik ákimdik. Osy jobalar halyqqa jany bolýǵa, ashyqtyqty qamtamasyz etýge múmkindik beredi. Búgin servıstik ákimdik ashý arqyly Talǵar aýdanynyń turǵyndaryna qolaıly jaǵdaı jasalyp otyr. Memlekettik qyzmet alý boıynsha azamattardyń saýaldaryna osynda otyrǵan mamandar jaýap beredi, tıisti qyzmet kórsetedi. Memleket Basshysy Qasym-Jomart Toqaevtyń Qazaqstan halqyna Joldaýynda aıtylǵandaı, bizdiń ortaq mindetimiz – azamattardyń barlyq syndarly saýaldaryna jedel jáne tıimdi jaýap beretin "Halyq únine qulaq asatyn memleket" tujyrymdamasyn júzege asyrý», - dedi.
Sondaı-aq ǵımaratta "Jetisý – adaldyq alańy" jobasymen jabdyqtalǵan azamattardy qabyldaý kabıneti ornalasqan. Bul jerde aýdan ákimi, ákim orynbasarlary, mekeme basshylary turǵyndardy jeke máseleleri boıynsha qabyldaý júrgizedi.