Halyqaralyq adam quqyqtarynyń kúninde jáne genderlik zorlyq-zombylyqqa qarsy 16 kúndik jahandyq naýqan aıasynda «Batyr» qysqametrajdy fılminiń onlaın tusaýkeseri bolyp ótti, dep habarlaıdy Egemen.kz
«Batyr» fılmi segiz bedeldi halyqaralyq kınofestıvaldiń qatysýshysy jáne Ulybrıtanııalyq London X4 - Seasonal Short Film Festival festıvalinde «Úzdik qysqametrajdy fılm» jáne «Úzdik áıel róli» júldesiniń ıegeri.
«Batyr» fılmi — álemdi biz qalaǵandaı qalpyna keltirýdegi adam quqyqtarynyń mańyzdylyǵy, jahandyq yntymaqtastyq pen ortaq adamzattyń qajettiligi týraly taǵy bir ret málimdeý múmkindigi. BUU qoldaýymen fılm alǵash ret Qazaqstanda kópshilikke usynylady. Atalmysh fılmdi túsirý ıdeıasy ulynyń densaýlyǵyn saqtaýǵa úlken aqsha tabý úshin óz tánin qurban etken áıeldiń shynaıy oqıǵasynan týyndaǵan.
Onlaın tusaýkserge fılmniń prodıýseri Laýra Sapa, rejısser Elena Lısasına, basty róldi somdaýshy akterler Janel Serǵazına men Shyńǵys Kapın jáne de festıval agenti Áıgerim Ramazan qatysty.
Kórermen qaýymǵa fılmdi usyna otyryp, Laýra Sapa «Biz alǵashqy týyndymyzdy áıelder men qyzdarǵa qarsy genderlik zorlyq-zombylyq taqyrybyna arnaýdy uıǵardyq. Búkil álemde áıelder ultqa, jasyna jáne qyzmet salasyna qaramastan zorlyq-zombylyqqa ushyraıdy. HHI ǵasyrda biz áli de osy máselege tap bolatynymyz óte ókinishti. Zorlyq-zombylyqqa jol bermeý tetikteri kóbine azdyq etip jatady. Zamanaýı qoǵam agressıvti bola bastady» dep atap ótti.
«Somdaǵan rólim óte qyzyqty, biraq sonymen birge bul róldiń qıyndyqtary da kóp boldy. Qazaqstandyq áıel kún saıyn batyr atanyp, kishkentaı ári úlken jetistikter men jeńisterdiń sebepkeri bolady. Naǵyz batyrlar – óz otbasy men balalarynyń amandyǵy úshin kúresetin qarapaıym áıelder», dep óz basty róldi somdaýshy aktrısa Janel Serǵazına óz oıymen bólisti.
Bıylǵy jyly Adam quqyqtary kúni men 16 kúndik jahandyq naýqan taqyryby COVID-19 pandemııasymen baılanysty jáne osy salada júzege asyrylatyn is-sharalarda adam quqyqtarynyń ortalyq rólin qamtamasyz etý arqyly tıimdi qalpyna keltirý qajettiligine baǵyttalǵan. Eger biz barlyǵyna birdeı múmkindik jasap, COVID-19 anyqtalǵan jáne ınfeksııanyń taralýyna yqpal etetin kemshilikterdi joıa alsaq jáne genderlik zorlyq-zombylyq, oqshaýlaý jáne kemsitýshilik problemalarymen tamyrlanǵan jáne júıeli túrde kórinetin problemalarmen kúresý úshin adam quqyqtary standarttaryn qoldana bilsek, barlyǵymyz birge ortaq jahandyq maqsattarǵa qol jetkizemiz.
BUU qalyń jurtshylyqty, seriktesterdi transformasııa júrgizýge qoldaý kórsetýge tartýǵa jáne neǵurlym tıimdi qalpyna keltirýge járdemdesetin jáne ómirsheń ári ádil qoǵam úshin jaǵdaı jasaı alatyn praktıkalyq is-sharalardyń rýhtandyratyn mysaldaryn kórsetýge umtylady.