Almatyda «Uly Jibek jolyndaǵy mádenıet pen din» taqyrybynda mýzeı ekspozısııasy ashyldy. Onlaın formatta ótken rýhanı shara mádenıet jáne sport mınıstrligi IýNESKO qamqorlyǵyndaǵy Halyqaralyq mádenıetterdi jaqyndastyrý ortalyǵynda ótti, dep habarlaıdy Egemen.kz.
Ekspozısııaǵa ejelgi jáne ortaǵasyrlyq Talǵar, Qoılyq, Otyrar qalalarynda júrgizilgen arheologııalyq qazbalardan tabylǵan qundy eksponattar qoıylǵan. Mýzeıdiń ekinshi zalyna «Dinaralyq tatýlyqtyń qalyptasýy. Uly Jibek joly qalalaryndaǵy dinaralyq yntymaqtastyq pen beıbitshilik» atty taqyryp berilgen. Onda baı tarıhymyz ben dinaralyq yntymaq shejiresi ótken zamannan syr shertedi.
Sharanyń ashylý saltanatynda mekeme basshysy Oljas Súleımenov sóz sóılep, bul mýzeıdiń asa mańyzdy tarıhı qundylyq ekenin atap ótti.
«Uly Jibek Joly ejelgi jáne ortaǵasyrlardaǵy iri baılanys arnasy bola otyryp, taýar men tehnologııa almasýmen qatar, túrli mádenıet, dástúr, ıdeıa jáne dinı uǵymdardyń ózara baılanysy men jaqyndyǵyn damytty. Ejelgi qazaq jerinde ómir súrip, qyzmet istegen uly tulǵalardyń qýatty ıntellektýaldyq deńgeıi Uly Jibek jolynyń boıynda álemdik dinderdiń, mádenıet pen ónerdiń berik irgetasyn qalady», dedi Oljas Omaruly.
Dırektordyń orynbasary Aıbek Sydyqov jańa ekspozısııanyń qurylymymen tanystyrdy. Ekspozısııada Uly Jibek joly boıyndaǵy ortaǵasyrlyq shaharlar oryndarynan tabylǵan qundy jádigerler jınaqtalǵan. Sonymen qatar Uly Jibek joly arqyly taralǵan dinderdiń tarıhy zamanaýı aqparattyq tehnologııalar arqyly úsh tilde usynyldy.
Ekspozısııa baǵdarlamasynan halyqaralyq ortalyqtyń qyzmeti, IýNESKO jáne Qazaqstan halqy Assambleıasymen yntymaqtastyǵy týraly málimet te tys qalmady.