QR Prezıdentiniń ótinishi boıynsha Konstıtýsııalyq Keńes Respýblıka Konstıtýsııasynyń ólim jazasyn qoldaný máselelerin reglamentteıtin erejelerine túsindirme berdi, dep habarlaıdy Egemen.kz
Memleket basshysynyń ótinishi Qazaqstannyń О́lim jazasynyń kúshin joıýǵa baǵyttalǵan Azamattyq jáne saıası quqyqtar týraly halyqaralyq paktige ekinshi Fakýltatıvtik hattamany (budan ári - Fakýltatıvtik hattama) aldaǵy ýaqytta ratıfıkasııalaýymen baılanysty boldy. О́tinishte Respýblıka Konstıtýsııasy erejeleriniń jáne Fakýltatıvtik hattamanyń eń aýyr jazany qoldaný máselelerin retteıtin normalarynyń araqatynasy týraly másele qoıyldy.
Konstıtýsııalyq Keńes Fakýltatıvtik hattamany ratıfıkasııalaý úshin Negizgi Zańǵa túzetýler engizýdiń qajeti joq dep sheshti. Bul rette, Keńes Konstıtýsııaǵa jáne jalpyǵa birdeı tanylǵan halyqaralyq aktilerge sáıkes ómir súrý quqyǵy demokratııalyq qoǵamnyń negizgi qundylyǵy bolyp tabylatynyn jáne memleket barlyq adamdar úshin osy quqyqty júzege asyrýǵa kepildik berýge mindetti ekenin atap ótti. Álemdik qoǵamdastyqtyń teń quqyqty múshesi retinde Qazaqstan alǵashqy kezden bastap qylmystyq zańnamada ólim jazasynyń kúshin joıý úrdisin eskerip keledi jáne osy jyldar ishinde elde eń aýyr jazany qoldanbaýdyń ornyqty quqyqtyq rejımi qalyptasty.
Osy baǵytty dáıekti iske asyrýdaǵy kezekti kezeńdi Qazaqstan Respýblıkasynyń 2020 jylǵy 23 qyrkúıekte atalǵan Fakýltatıvtik hattamaǵa qol qoıýy ashty. Qazaqstan Konstıtýsııasynda adamdardyń qaza bolýymen baılanysty terrorıstik qylmystar jasaǵany úshin, sondaı-aq soǵys ýaqytynda erekshe aýyr qylmystar jasaǵany úshin ólim jazasyn belgileýge jol beriletinin nazarǵa ala otyryp, Keńes ólim jazasynyń kúshin joıý týraly halyqaralyq shartty ratıfıkasııalaý Respýblıka Parlamentiniń quzyretine kiretinin atap ótti. Bul rette, Negizgi Zańda osy qylmystar úshin qylmystyq zańda ólim jazasyn belgileý nemese odan bas tartý, olardyń sheńberin qysqartý týraly máseleni Parlamenttiń qaraýyna qaldyrylady.
Zań shyǵarýshy ólim jazasynyń kúshin ulttyq zańnamaǵa tıisti túzetýler engizý arqyly ǵana emes, sondaı-aq jazanyń osy túri belgilenýi múmkin qylmystardy joıýdy nemese olardyń sanyn shekteýdi kózdeıtin halyqaralyq shartty ratıfıkasııalaý arqyly da joıa alady. Keńes óz sheshiminde Konstıtýsııa Fakýltatıvtik hattamany ratıfıkasııalaýǵa kedergi bolmaıtynyn atap ótti. Fakýltatıvtik hattama ratıfıkasııalanǵannan keıin Qazaqstan Respýblıkasynyń Qylmystyq kodeksi onyń talaptaryna sáıkes keltirilýi tıis.
Konstıtýsııalyq Keńes qaýlysynyń tolyq mátini baspasózde jáne Keńes saıtynda jarııalanady. Eske salaıyq, 23 qyrkúıekte Birikken Ulttar Uıymynyń shtab-páterinde Qazaqstannyń BUU janyndaǵy Turaqty ókili Qaırat Omarov ólim jazasyn joıýǵa baǵyttalǵan Azamattyq jáne saıası quqyqtar týraly halyqaralyq paktiniń ekinshi Fakýltatıvtik hattamasyna qol qoıdy.
Sol kúni ólim jazasyn joıý týraly halyqaralyq Hattamaǵa qosylý týraly sheshimdi Qazaqstan Prezıdenti Qasym-Jomart Toqaev BUU Bas Assambleıasynyń 75-shi mereıtoılyq sessııasynyń jalpy saıası pikirtalas barasynda sóılegen sózinde jarııalady. Keıinnen QR Syrtqy ister mınıstrliginiń baspasóz qyzmeti Qazaqstannyń atalmysh halyqaralyq paktige qosylýyna qatysty túsinikteme berdi.