RG Gold kompanııasy Aqmola oblysynda taý-ken metallýrgııa keshenin jobalaýdy bastady. Jobany júzege asyrý úshin ónerkásiptik obektilerdi jobalaý men salýda kóshbasshy - qazaqstandyq AAEngineering Group kompanııasy tartyldy. Investısııalardyń jıyntyq kólemi 160 mlrd teńgeden asady, dep jazady Egemen.kz QR IIDM Baspasóz qyzmetine silteme jasap.
Jańa fabrıkanyń qýattylyǵy jylyna 5 mln tonna bastapqy kendi quraıdy. Jazda jerge qatysty barlyq daıyndyq jumystary júrgizildi. Qurylys 2022 jyldyń tórtinshi toqsanynda aıaqtalady.
Aıta ketý kerek, 2014 jyldan bastap geologııalyq barlaý jumystaryna 7 mlrd teńgege jýyq ınvestısııa quıyldy. Geologııalyq barlaý nátıjeleri boıynsha baǵaly metaldyń qory 100 tonnany qurady, al resýrstar JORC halyqaralyq jiktemesi boıynsha 185 tonnaǵa baǵalandy. Raıgorodok ken ornynyń áleýeti áli tolyq zerttelgen joq. Geologııalyq barlaý jumystary jáne olarǵa ınvestısııa salý jalǵasýda.
"Jańa fabrıka 1 100-den astam qazaqstandyqty turaqty jumyspen qamtamasyz etýge múmkindik beredi, al memlekettik bıýdjetke jıyntyq salyq aýdarymdary jylyna 20 mlrd teńgeni quraıdy. Kompanııa jyl saıyn óńirdiń áleýmettik-ekonomıkalyq damýy men ınfraqurylymyn jaqsartýǵa 100 mıllıonnan astam teńge bóledi. Mysaly, kúrdeli jóndeý júrgizilip, jaqyn mańdaǵy aýyldardaǵy mektepter jaraqtandyryldy, aýdan turǵyndary úshin jańa uńǵyma burǵylandy, Shýche aýdan ortalyǵy men Dmıtrıevka aýyly arasyndaǵy avtojoldarǵa jóndeý júrgizildi", dep tolyqtyrdy RG Gold bas dırektory Loýrens Rossoý.
RG Gold óziniń qyzmetinde korporatıvtik basqarýdyń, ekologııalyq jáne áleýmettik jaýapkershiliktiń joǵary talaptaryn ustanady. Kásiporyn ýákiletti memlekettik organdarmen jáne syrtqy aýdıtorlarmen belsendi ózara is-qımyl jasaıdy, sondaı-aq toqsan saıynǵy negizde atmosferalyq aýany, sý resýrstaryn, topyraqty jáne radıasııalyq fondy zertteýdi qamtıtyn qorshaǵan ortanyń jaı-kúıine monıtorıng júrgizedi. Ekologııalyq monıtorıng nátıjeleri kompanııa saıtynda jarııalanady. Barlyq qyzmetkerler trenıngterden ótedi jáne qaýipsizdik tehnıkasy boıynsha tıisti emtıhandardy tapsyrýǵa mindetti.
Fabrıkany jobalaý men salýdyń barlyq kezeńinde Aqmola oblysy turǵyndarynyń, jergilikti atqarýshy bılik ókilderiniń jáne ekobelsendilerdiń qatysýymen jeti qoǵamdyq tyńdaý ótkizildi, jeltoqsan aıynyń sońynda taǵy bireýi ótedi. Qoǵamdyq tyńdaýlardyń barlyq hattamalary Aqmola oblysynyń Tabıǵı resýrstar jáne tabıǵat paıdalanýdy retteý basqarmasynyń saıtynda jarııalanady.