BQO qylmystyq ister jónindegi mamandandyrylǵan aýdanaralyq sotynda Jánibek aýdanynyń turǵyny Nazar Saparǵalıevke úkim shyqty, dep habarlaıdy Egemen.kz
Sýdıa Baqyt Ermahanov jarııa etken sot úkimimen 18 jastaǵy N.Saparǵalıev QR QK 99-babyna sáıkes aıypty dep tanylyp, 15 jylǵa bas bostandyǵynan aıyrý jazasyn qaýipsizdigi barynsha joǵary qylmystyq-atqarý júıesi mekemesinde óteýge sottaldy.
Oǵan qosa sottalýshy jábirlenýshiniń otbasyna 10 mln teńge moraldyq zalaldy óteýge mindetteldi. Qandy oqıǵa bıylǵy sáýir aıynda Qamysty aýylynda boldy. Dosymen júrgen N.Saparǵalıevke ózderinen úlken eki aýyldasy tıisken. Sottalýshy bul jóninde óziniń aǵasyna aıtyp, kómektesýdi ótingen. Kúndiz sózge kelgen tarappen habarlasyp, kezdesý belgilegen.
Kezdesýge jábirlenýshi tarapynan bes, aıyptalýshy jaǵynan segiz adam barǵan. N.Saparǵalıev asúı pyshaǵyn ala shyǵyp, tóbeles kezinde jábirlenýshi K-nyń keýde tusyna jumsaǵan.
Jábirlenýshi aýrýhanaǵa barar jolda kóz jumdy. Aıta ketetin jaıt, jábirlenýshi N.Saparǵalıevpen janjaldaspaǵan. Ol sol kúni tek dostaryna erip kelgen. Kýálar qaıyrymdy, elgezek adam retinde sıpattaǵan marqumnyń sońynda jary, úsh balasy qaldy.
Sot úkimi zańdy kúshine engen joq. Eske sala keteıik, budan buryn BQO sotynyń óz áıelin kepildikke alǵan turǵynǵa qatysty úkimdi ózgerissiz qaldyrǵanyn jazǵan bolatynbyz.