Shyǵys Qazaqstan oblysynyń Aıagóz qalasyndaǵy arnaıy áleýmettik kómek ortalyǵyndaǵy tórt balanyń ólimine qatysty sot úkimi shyqty, dep habarlaıdy Egemen.kz
Aıagóz aýdandyq sotynyń baspasóz qyzmeti cot sheshimi boıynsha balalardyń ólimine úsh medısına qyzmetkeri kináli dep tanylǵanyn málimdedi. Olarǵa «mindettemelerin oryndamaǵan, osynyń saldarynan balalar kóz jumǵan» degen aıyp taǵyldy.
Is sotqa prosessýaldyq kelisimmen jetken. Prokýror men sottalýshylar jábirlenýshiniń kelisimimen (balalar ortalyǵy) prosessýaldyq kelisimge kelgen. Kelisimdi negizge ala otyryp, prokýror medısına qyzmetkerleriniń ekeýiniń 2 jylǵa bas bostandyǵyn shekteýdi, olarǵa 1 jyl boıy medısınalyq jumysty atqarýǵa tyıym salýdy, al úshinshi qyzmetkerdiń 3 jyl 6 aıǵa bas bostandyǵyn shekteýdi, oǵan 1 jyl 6 aı boıy medısınalyq jumysty atqarýǵa tyıym salýdy suraǵan.
Sotta taraptardyń bári de, onyń ishinde jábirlenýshi tarap ta osy kelisimdi maquldaıtynyn jetkizdi. Sotta atalyp ótkendeı, QR Qylmystyq kodekstiń 317-baby 3-bóligi aýyr qylmys sanatyna jatpaıdy. Al 317-baptyń 4-bóligi aýyrlyǵy ortasha qylmys sanatyna jatady. Prokýror usynǵan jaza baptyń sanksııasyna saı kelgen.
Sottalýshylar buryn isti bolmaǵan. Kelisimde kórsetilgen jazadan aýyr jaza berýge bolmaıdy. Baıandalǵan istiń negizinde sot aıyptalýshylardy kináli dep tanyp, olarǵa kelisimge sáıkes jazany taǵaıyndady. Úkim zańdy kúshine engen joq.
Aıta ketsek, buǵan deıin osy ortalyqtaǵy on shaqty balanyń «qyzylsha» dıagnozymen ınfeksııalyq aýrýhanaǵa túskeni habarlanǵan edi. Aýrýhanaǵa jetkizilgen balalardyń tórteýi kóz jumǵan edi.