Elimizde medısınalyq saqtandyrý engizilgeli beri júrek-qan tamyr aýrýlaryn emdeý, kúrdeli ota jasatý josparly túrde MÁMS júıesinde jáne tegin medısınalyq kómektiń kepildendirilgen kólemi aıasynda jasalady, dep habarlaıdy Egemen.kz
Nur-Sultan qalasynda ornalasqan Kardıohırýrgııa ortalyǵyna naýqastar Qazaqstannyń kez kelgen aımaǵynan portal, kvota arqyly túse alady. Oǵan eshqandaı shekteý joq. Ota kezeginde turǵan naýqastar asa kóp emes deýge bolady, shamamen 1 aıdaı ǵana kútedi.
«MÁMS aıasynda ota jasatqysy keletin naýqastarǵa mindetti túrde EKG, EHOKG, Holter monıtor EKG, jedel járdem kezindegi EKG qajet. Osy tekserýlerden keın bizdiń ortalyqta arıtmologtyń keńesi qajet. Maman keńesin alý úshin baılanys ortalyǵyna habarlasyp, aldyn ala jazylý kerek», deıdi Ulttyq ǵylymı kardıohırýrgııa ortalyǵynyń ıntervensııalyq arıtmologııa bólimshesiniń meńgerýshisi, medısına ǵylymdarynyń doktory, qaýymdastyrylǵan professor, Qazaq arıtmologtar qoǵamynyń prezıdenti Aıan Súleımenuly Ábdirahmanov.
Biraz ýaqyt buryn gıpertrofııalyq kardıomıopatııa dıagnozymen túsken naýqasqa Kardıohırýrgııa ortalyǵynyń dárigerleri Qazaqstanda jáne Orta Azııada alǵashqy ret teri astyna qoıylatyn kardıoverter-defıbrıllıator apparatyn qoıdy (S-ICD - subcutaneous implantable cardioverter-defibrillator). Bul apparattyń ereksheligi múldem qan-tamyr júıesine eńgizilmeıdi, sonymen qatar teri astynda turyp kenetten bolatyn júrek óliminen qutqarady. Jańa joǵary tehnologııalyq qyzmet túrine jatatyn bul ota Kardıohırýrgııa ortalyǵynyń kúshimen jasaldy.
«Taǵy bir erekshe mysal: naýqas 36 jasta, dıagnozy - tolyq 3 sanatty AV-blokada. Birneshe ret elektrokardıostımýlıator aýystyrylǵan, biraq qan-tamyr men júrek ishindegi elektrodtary qala bergen. Bizdiń ortalyqqa túskende stımýlıatordyń orny irińdep, sepsıs bolǵan. Bul jaǵdaıda barlyq ishtegi ımplanttardy alý qajet, ishtegi elektrodtar tamyrmen - júrekpen bitip ketken. Olardy alý naýqastyń ómirine óte kúrdeli, almasqa amal joq. Ishtegi elektrodtardyń bárin alyp, ornyna TMD memleketteri ishinde alǵashqy bolyp 2017 jyldyń 22 tamyzynda elektrodsyz dúnıe júzindegi eń kishkentaı Micra stımýlıatoryn ornattyq. Qazir naýqastyń jaǵdaıy jaqsy, jylyna 1 ret baqylaýǵa kelip turady» dep eske alady A.Ábdirahmanov.
Qazirgi jaǵdaıda Kardıohırýrgııa ortalyǵynda júrek yrǵaǵynyń buzylýyna qatysty joǵarǵy tehnologııalyq zamanaýı barlyq otalar jasaýǵa múmkinshilik bar. Bilikti dárigerler úshin tipti jańa týǵan nárestelerge de ota jasaý - qalypty jaıt.
«Júrek yrǵaǵynyń buzylýy kóbine júrek aqaýy, ıshemııa, qan qysymynyń kóterilýi, t.b. júrek aýrýlarynyń sebebinen bolady. Sondyqtan, múmkindiginshe sportpen aınalysý, dıeta ustaný, maıly tamaqtan tejelý, artyq salmaqtan arylýdyń jolyn izdeý qajet. Júrek aýrýlarynyń aldyn alý – salaýatty ómir súrýge baılanysty», dep keńes beredi maman.