Túrkistan oblysynan aǵymdaǵy jyly «Eńbek» baǵdarlamasy boıynsha 1 myńnan asa múshesi bar 335 otbasy soltústik óńirlerge qonys aýdarǵan, dep habarlaıdy Egemen.kz
Túrkistandyqtar Qostanaı, Shyǵys Qazaqstan, Soltústik Qazaqstan oblystary jáne Pavlodar oblysyna qonystandy, dep habarlaıdy QazAqparat tilshisi. Jalpy soltústik oblystardyń qataryn tolyqtyrǵan túrkistandyqtardyń sany 5 364 adamdy qurap otyr.
Olar 1 494 otbasynyń múshesi bolyp tabylady. Bul óńirdegi úgit-nasıhat jáne túsindirý jumystarynyń nátıjesinde júzege asqan. Oblys ákimdiginiń uıymdastyrýymen osy baǵdarlamany nasıhattaý boıynsha óńirdiń BAQ ókilderi SQO, Qostanaı jáne Aqmola oblystarynda bolyp qaıtty. Sonymen birge «Nur Otan» partııasynyń Túrkistan oblystyq fılıaly aýdan, qalalarda turǵyndarmen kezdesip, teriskeıge qonys aýdarýdyń sharttary men tıimdi tustaryn keńinen nasıhattady.
Osy jáne ózge de mańyzdy kórsetkishter QR Eńbek jáne halyqty áleýmettik qorǵaý mınıstri Birjan Nurymbetovtyń Túrkistan oblysyna sapary barysynda aıtyldy. Mınıstr oblystaǵy halyqty áleýmettik qorǵaý salasyndaǵy memlekettik saıasatty júzege asyrý barysyndaǵy 2020 jyly atqarylǵan jumystarǵa oń baǵasyn berdi.
Aıta keteıik, aǵymdaǵy jyly aımaqta jumys berýshilerge sheteldik jumys kúshin jumysqa tartýǵa 770 kvota bólinip, 16 kásiporynda 71 shetel azamatyna ruqsat berilgen bolatyn.