Bıyl Brent markaly munaı baǵasy jıi qubylýmen boldy. Negizinen barreline 35-40 dollar aralyǵynda ózgerip turdy. Soǵan baılanysty valıýta naryǵynda da turaqsyzdyq ornady. Jyl sońyna qaraı azyq-túliktiń qymbattaýy qatty baıqaldy. Munyń árqaısynda pandemııanyń «úlesi» zor. Osy oraıda, Ulttyq bank (UB) keler jylǵa arnalǵan makro ekonomıkalyq boljamyn jarııa etti, dep habarlaıdy Egemen.kz
Ulttyq bank tóraǵasynyń orynbasary Aqyljan Baımaǵambetovtyń aıtýynsha, keler jyly álemdik munaı baǵasy barreline 48,3 dollar kóleminde bolmaq.
– 2020 jylǵa arnalǵan JIО́ boljamy azaıady dep túzetildi, shamamen 2,5–2,7 paıyz aralyǵynda. Kóbine bul shyn mánindegi JIО́-niń aıtarlyqtaı tómen traektorııasymen jáne eldiń jekelegen óńirlerindegi epıdemıologııalyq jaǵdaıdyń nasharlaýymen baılanysty. Álemdik ekonomıka men ishki suranys qalpyna kelgen soń, JIО́ 2021 jyldyń ekinshi jarty jyldyǵynda jaǵymdy zonaǵa qaraı aýysady. Kelesi jyldyń qorytyndysy boıynsha ósim qarqyny 3,7–4,0 paıyz bolady. 2022 jyldyń birinshi jarty jyldyǵynda osy ósim qarqyny saqtalady degen boljam bar, dedi Baımaǵambetov.
Sarapshynyń aıtýynsha, epıdemıologııalyq jaǵdaı jaqsarsa – tutynýshylar belsendiligi artady, eńbek naryǵynda oń ózgeris baıqalady, halyq tabysy men tutyný nesıesi kóbeıedi, soǵan sáıkes ınvestısııalyq belsendi áreketter paıda bola bastaıdy. Sonymen qatar ekspert 2021 jyldyń sońynda ınflıasııa mólsherin 4,6 paıyz aralyǵynda kútetinderin de málimdedi.
– COVID-19 pandemııasy bastalǵannan beri biz azyq-túliktiń jyldyq baǵasy qarqyndy óskenin baıqaýǵa bolady. Negizinen bul TJ rejımi kezinde jáne shekaralar jabylǵan kezde jetkizý tizbeginiń buzylǵanyna baılanysty. Azyq-túliktiń jekelegen túrlerine, ıaǵnı, halyq ımmýnıtetin kúsheıtý úshin tutynatyn azyq-túlik túrlerine (sarymsaq, zimbir, jemister, atap aıtqanda sıtrýs jemisteri) degen suranystyń artqanyn baıqaýǵa bolady. Osy kezeńde halyq azyq-túlik túrlerin bolashaqta paıdalaný úshin kóp satyp alǵany anyqtaldy. Azyq-túlik ınflıasııasynyń osyǵan uqsas qarqyndy ósimi álemniń kóptegen elderinde kórinis tapty, dedi UB ókili.