Soltústik Qazaqstan oblysynda tártip saqshylary bıyl iz-túzsiz joǵalǵan 67 adamdy tapty, dep habarlaıdy Egemen.kz
SQO Polısııa departamenti baspasóz qyzmetiniń málimetinshe, adamdardyń habar-osharsyz ketýiniń eki sebebi bar. Eń birinshisi – maskúnemdik. Araqqa salynǵan adam ózi sııaqty spırttik ishimdik ishetinderdi jaǵalaıdy. Olar úshin otbasy, týǵan-týys ekinshi orynda.
«Taǵy bir jıi kezdesetin ssenarıı – adamdar jaqyndaryn eskertpeı, tabys tabýǵa ketedi. Bul – jaýapsyzdyq. Ony ata-anasy, týǵan-týystary izdep, alańdaıtynyna mán bermeıdi», deıdi SQO Polısııa departamenti Krımınaldyq polısııa basqarmasynyń bastyǵy Petr Klımov.
Polıseılerdiń aıtýynsha, maskúnemdikke salynyp, joǵalatyndardyń qatarynda áıelder de bar. Jaqynda tártip saqshylary Ǵabıt Músirepov atyndaǵy aýdan turǵynynyń ótinishi boıynsha otbasyn tastap ketken áıeldi izdestirdi. 27 jastaǵy kelinshek Qostanaı oblysynan tabyldy. Ol buryn alkogoldik ishimdik ishkeni úshin ákimshilik jaýapqa tartylǵan eken.
«Iz-túzsiz joǵalǵandardy izdestirý – krımınaldyq polısııa jumysynyń bir baǵyty. Izdestirý is-sharasyna kóp adam tartylady: jedel ýákilder, volonterler uıymdarymen birlese faktilerdi tekseredi. 11 aıdyń ishinde SQO-da habar-osharsyz ketken 90 adam izdestirildi. Onyń 67-siniń júrgen jeri anyqtaldy», deıdi Petr Klımov.