Azattyq tańyn óz kózimen kórgen aldyńǵy býyn bolmasa, keıingi jastar ótken ǵasyrdyń 90-jyldaryndaǵy tarıhı oqıǵalardyń tereńine boılap, mánin jete túsine bermeıdi. Táýelsizdikke taǵdyrdyń bere salǵan syıy retinde qaraıdy. Shyn mánindegi ahýal olaı emes. Bul týraly QR Prezıdenti Qasym-Jomart Toqaev «Egemen Qazaqstan» gazetinde jarııalaǵan «Táýelsizdik bárinen qymbat» atty maqalasynda aıtty, - dep habarlaıdy Egemen.kz
«Elbasy sol kezdegi saıası, ekonomıkalyq, áleýmettik, demografııalyq jáne basqa da jaǵdaılarǵa baılanysty jeti ret emes, jetpis ret ólshep, bir ret kesýge májbúr boldy. Biz tyǵyryqtan shyǵar joldyń sańylaýy da kórinbeıtin qıyn kúnderden qaqtyǵys pen qantógiske urynbaı aman shyǵyp, eshkimge esemizdi jibermeı, jańa sıpattaǵy Qazaq memleketin qurdyq. Búgingi jáne bolashaq urpaq muny árdaıym bilip otyrýy kerek. Sol úshin Qazaqstannyń jańa tarıhyn da júıeli zerttegen jón», - dedi Prezıdent maqalasynda.
Onyń aıtýynsha, Táýelsizdik jyldarynda birneshe ret qolǵa alynǵanyna qaramastan, ulttyq múddemizge saı keletin kóp tomdyq jańa tarıhymyz áli tolyq jazylǵan joq. Onyń tujyrymdamasyn buǵan deıingi olqylyqtardy eskere otyryp qaıta qarap, jańa ǵylymı ustanymdar men jańalyqtardyń negizinde tyńnan jazatyn ýaqyt áldeqashan keldi. Barlyq oqýlyqtar osyndaı irgeli eńbekke negizdelip ázirlenedi.
«Bul – ult shejiresin dáripteý turǵysynan alǵanda strategııalyq mańyzy bar másele. Sondyqtan, Qazaqstannyń akademııalyq úlgidegi jańa tarıhyn jazýdy dereý bastaý kerek. Túptep kelgende, tarıhı sanany jańǵyrtý máselesiniń túıini – osy. Bul iske bedeldi tarıhshylarymyzdy tartý qajet.
Sonymen qatar, shetel aýdıtorııasyna arnalǵan Qazaqstannyń qysqasha tarıhyn jazyp, álemniń negizgi tilderine aýdarýdy usynamyn. Bul – qazaqtyń san ǵasyrlyq shynaıy tarıhyn álemge tanytýdyń birden-bir joly», - dedi Memleket basshysy.
Sondaı-aq Prezıdent árbir halyq óziniń arǵy-bergi tarıhyn ózi jazýy tıis ekenin basa aıtty.
«Bóten ıdeologııanyń jetegimen júrýge bolmaıdy», - degen Qasym-Jomart Kemeluly maqalasynda ulttyq múdde turǵysynan jazylǵan shejire urpaqtyń sanasyn oıatyp, ulttyń jadyn jańǵyrtýǵa múmkindik beretinin atap ótti.