Sońǵy jyldary elimizde kók muzda jeldeı esken jyldamdyqty saqtaı otyryp, qaýipti burylystarda súrinbeı, qarsylastardy basyp ozýdy kózdeıtin short-trek sportyna degen qyzyǵýshylyq aıtarlyqtaı artyp keledi. Buryn kópshilikke etene tanys bolmaǵan bul qysqy sport túri búginde jas sportshylardyń tańdaýly baǵytyna aınalyp otyr. Baldyrǵandardyń short-trekpen turaqty shuǵyldanýyna tórtjyldyqtyń basty básekeleri men halyqaralyq arenada el quramasynyń sátti óner kórsetýi de sebep bolatyny sózsiz, dep jazady Egemen.kz.
Máselen, Italııada ótken HHV qysqy Olımpıada oıyndarynda short-trek sheberleri Denıs Nıkısha men Abzal Ájiǵalıev jekeleı syndarda úzdik ondyq qatarynan kórinip, otandyq short-trektiń áleýetti ekenin dáleldedi. Sondaı-aq Álem kýbogi kezeńderinde kózge túsip júrgen Ádil Ǵalıahmetov pen Olga Tıhonovanyń óneri órenderdiń boıynda short-trekke degen shynaıy qyzyǵýshylyq alaýyn jaǵyp júr. Dúbirli dodalardaǵy aıtýly jetistikter Qazaqstan mártebesin bıiktetip qana qoımaı, osy sportta jańa býyn ókilderiniń qalyptasýyna jol ashyp jatyr. Biz bul kóńil kónshiter kóriniske Astana qalasy ákimdiginiń №2 Balalar men jasóspirimder mamandandyrylǵan sport mektebiniń short-trekshi shákirtteriniń jattyǵý barysynda kóz jetkizdik.
«Short-trektiń Marko Roısy men shyǵarmyn...»: Abzal Ájiǵalıev jankúıerlerine alǵys aıtty
Short-trek sportynda mıllısekýndtar da mańyzdyJas short-trekshiler jattyǵý kezinde fızıkalyq, psıhologııalyq, taktıka jáne tehnıkalyq ázirlik boıynsha shyńdalady. Olar osy tórttikti boıyna sińirý úshin aptanyń 6 kúninde 6 saǵatyn muz ústinde ótkizedi.
Short-trek boıynsha Astana qalalyq jasóspirimder quramasynyń múshesi Tomırıs Erbatyr úshin tyǵyz jattyǵý ýaqyty men muz ústindegi qaýip qorqynyshty emes. 16 jastaǵy sportshynyń aıtýynsha, short-trekpen 7 jyldan beri úzdiksiz shuǵyldanýyna jyldamdyqqa degen umtylys pen jeńiske degen qulshynys jiger beredi.
«Short-trek muzda óte joǵary jyldamdyqpen júgirýdi talap etýimen adamdy baýrap alady. Al jyldamdyqty saqtaı otyryp, qaýipti burylystardy qateliksiz ótkerý mıssııasy kimdi de bolsyn qyzyqtyrmaı qoımaıdy. Sonymen qatar, qarsylastarmen saıysqa túskende olardy basyp ozý úshin logıkany qosyp, synı oılaı alý qajet. Sol arqyly olardy aınalyp ótip, tıimdi trıýktar jasap, máre syzyǵyn birinshi kesýge bolady. Aıta keterligi nátıjeniń barlyǵy ýaqyt kórsetkishi boıynsha saralanady. Sondyqtan short-trekte mıllısekýndtar sheshýshi orynǵa shyǵyp jatady», deıdi Tomırıs Erbatyr.
Short-trekshi Denıs Nıkısha Olımpıadada 7-orynǵa turaqtady
Short-trekpen 5-7 jastan bastap shuǵyldanýǵa ruqsat etiledi. О́zgelermen salystyrmaly túrde keshirek konkı kıgen Tomırıs atalǵan sportqa tez beıimdelgen. Tipti qalalyq, respýblıkalyq syndarda júldegerler qatarynan kórinip úlgergen.
«Short-trek – meniń sanaly tańdaýym. Sondyqtan bul sport ómirimniń mazmundy bólshegine aınaldy. Qazaqstan birinshiliginde komandalyq estafeta synynda 1-shi tuǵyrdan kórinip, jazǵy short-trektegi jekeleı synda úzdik úshtikti túıindeýim ózime degen senimimdi arttyrdy», deıdi jas short-trekshi.
Al kishi qurama bapkeri Rahat Qasenuly el chempıonatynda júldeger bolýdyń ózi joǵary jetistik ekenin atap ótti. Sebebi respýblıkalyq deńgeıde óner kórsetý úshin sportshy kemi 1-2 jyl ýaqytyn jattyǵýǵa arnaıdy.
«Short-trekte basqa sport túrlerindegideı 4-5 aı jattyǵyp, jarysta baq synaýǵa ruqsat etile bermeıdi. Aldymen sportshy muz ústinde ózin erkin seziný úshin ter tókse, odan keıin tehnıkalyq tásilderdi meńgerý kerek. Konkımen júgirý jáne short-trekti salystyratyn bolsaq, short-trekshiler fınalǵa jetý úshin bir kúnde 4-5 ret muzǵa shyǵyp, ýaqyt kórsetkishine júgiredi. Konkımen júgirýshiler bir kúnde 1-aq ret saıysady. Short-trekte kóp aınalym bolatyndyqtan, sportshy kúshin ár kezeńge laıyqty bóle bilýi tıis. Qaı mańda, neshinshi aınalymda ozý kerek ekenin bala ishteı esepteı alýy tıis. Onyń barlyǵyna jattyǵý kezinde daǵdylanamyz. Tehnıkalyq turǵyda talantty bala jetistikke tezirek jetip jatady», deıdi bapker.
Qysqy Olımpıada oıyndarynan keıin short-trekke qyzyǵýshylar qatary arttyBúginde Rahat Hasenuly baptap júrgen shákirtteriniń altaýy sport kandıtaty dárejesin ıelengen. Sondaı-aq 8-15 jastaǵy kishi qurama ókilderi Qazaqstanmen qatar shet elderdegi halyqaralyq jarystardan júldemen oralyp júr.
Qazaqstan quramasynyń qysqy Olımpıadadaǵy joly: Jyldar men nátıjeler
«Maýsym saıyn kórsetkishter kóńilden shyǵyp keledi. О́zderińizge belgili, kishi quram áýeli 222, 333 metr qashyqtyqta jarysady. Jas ereksheligine saı qashyqtyq uzara beredi. Ár sońǵy nátıjege saı shákirtterim atalǵan qashyqtyqta jeke rekordyn sekýndqa bolsyn alǵa jyljytyp júr. Elimizde tabysty óner kórsetken shákirtterim Qytaı, Koreıa elderindegi jarystardan medalmen oraldy», degen súıinshi jańalyǵyn jetkizgen Rahat Hasenuly, ásirese qysqy Olımpıadadan keıin short-trekke qyzyǵýshylar qatary qalyńdaıtynyn jetkizdi.
«Bul turǵyda ulttyq qurama músheleriniń eńbegi orasan. Olar qysqy sport qarqyndy damyǵan memleketterdiń ókilderimen terezesi teń óner kórsetip, el balalaryna halyqaralyq arenada úlgi bolyp júr. Máselen, sońǵy Italııanyń qos qalasynda ótken Olımpıada oıyndaryn shákirtterim túngi ýaqyt bolsa da talmaı qarady. Bıyl taǵy bir erekshelik retinde olardyń qataryna ata-analardyń da qosylǵanyn aıryqsha aıtqym keledi. О́z kezeginde ata-analar sportshyǵa ne úshin eskertý bergenin, márege ne úshin jete almaǵanyn belsendi surap, jaýap alyp otyrdy. Al munyń bári aldaǵy ýaqytta short-trekke keletin balalardyń qatarynyń artatynyn ańǵartady», deıdi Rahat Hasenuly.
Sol sekildi short-trekten kishi qurama múshesi Hamza Erkinulyn muz aıdynyna anasy jetelep ákelgen. Bastapqyda anasynyń aıtqan sózin jerge tastamaǵan ol 3 jyl ótse de short-trekpen qosh aıtyspaǵan. Sebebi, kók muzdaǵy joǵary jyldamdyq onyń da janyn baýraǵan.
«Bul sportpen turaqty shuǵyldanýyma tanymal short-trekshi Ádil Ǵalıahmetovtiń de áseri mol. Onyń ónerin úzbeı baqylaımyn, jyldamdyqty ıgere alýy, qarsylastaryn basyp ozýy syndy ónerinen úlgi alamyn. Sońǵy Olımpıadaǵa qatysqan short-trekshilerdiń de baǵdarlamasyn baqyladym. Tek azdaǵan sáttilik jetispedi. Degenmen Olımpıadaǵa qatysýdyń ózi úlken jetistik. Men de Olımpıada altynyn alyp, oǵan qatysýdy armandaımyn», dedi Hamza Erkinuly.