Japonııanyń soltústik jáne soltústik-shyǵys aımaqtarynda 7,7 magnıtýdaly kúshti jer silkinisi tirkeldi. Osyǵan baılanysty eldiń meteorologııalyq agenttigi sýnamı qaýpi týraly eskertý jarııalap, aldaǵy bir apta ishinde taǵy da kúshti dúmpýler bolýy múmkin ekenin habarlady, dep jazady Egemen.kz.
Sýnamı týraly eskertý Hokkaıdo, Aomorı jáne Ivate prefektýralarynyń Tynyq muhıty jaǵalaýyna jarııalanǵan. Mamandar tolqyn bıiktigi 3 metrge deıin jetýi múmkin ekenin boljady. Keıinirek bul eskertý qaýip deńgeıi tómendetilip, keńes sıpatyndaǵy habarlamaǵa aýystyryldy.
Ivate prefektýrasyndaǵy Kýdzı portynda 80 santımetrlik sýnamı tolqyny tirkelgen.
Qaýiptiń artýyna baılanysty bılik Hokkaıdodan bastap Tıbaǵa deıingi jeti prefektýradaǵy 182 eldi mekenge bir aptalyq arnaıy eskertý engizdi. Bul júıe 2022 jyldyń jeltoqsanynda iske qosylǵaly beri ekinshi ret qoldanylyp otyr.
Qytaı aýmaǵynda jer silkinisi tirkeldi
Jer silkinisi dúısenbi kúni saǵat 16:52-de tirkelgen. Onyń oshaǵy 19 shaqyrym tereńdikte ornalasqan. Dúmpý kúshi japondyq 7 baldyq shkala boıynsha «5+» deńgeıine jetip, Tokıonyń keıbir aýdandarynda da sezilgen.
Bul deńgeıde adamdarǵa tirek ustamaı júrý qıynǵa soǵady. Aomorı prefektýrasynda 60 jastaǵy er adam baspaldaqtan qulap, aýrýhanaǵa jetkizilgen, qazirgi jaǵdaıy turaqty.
Atom elektr stansııalarynda aqaýlar tirkelmegeni habarlandy. Atap aıtqanda, Aomorı, Mııagı jáne Fýkýsıma aımaqtaryndaǵy nysandar qalypty rejımde jumys istep tur.
Japonııa premer-mınıstri Sanae Takaıtı turǵyndardy qaýipsizdik sharalaryn saqtaýǵa jáne bıik jerlerge evakýasııalanýǵa shaqyrdy.
Sońǵy málimetter boıynsha, Hokkaıdo, Aomorı, Ivate, Mııagı jáne Fýkýsıma prefektýralarynan 156 myńnan astam adam evakýasııalanǵan.
Sonymen qatar Tokıo men Sın-Aomorı arasyndaǵy «Tohoký sınkansen» júrdek poıyzynyń qozǵalysy ýaqytsha toqtatyldy.
Kaspıı teńizinde bir túnde úsh jer silkinisi tirkeldi
Aıta keteıik, bastapqyda jer silkinisiniń magnıtýdasy 7,4 dep baǵalanǵanymen, keıin ol 7,7-ge deıin naqtylandy.