Qostanaı oblysynyń Qarasý aýdanynda kitapqa degen súıispenshilikti ómirlik muratqa aınaldyrǵan áýlet bar. Bul otbasy birneshe býyn boıy oqý mádenıetin nasıhattap, aǵartýshylyq joldy úzdiksiz jalǵastyryp keledi, depı jazady Egemen.kz.
Atalǵan dástúrdiń negizin qalaǵan – Zoıa Iаkovlevna Mıhalına. Ol týǵan aýylynda 30 jyldan astam ýaqyt kitaphanashy bolyp eńbek etip, kitap qoryn saqtaýmen qatar, mádenıet pen rýhanııattyń damýyna zor úles qosty. Zamandastary ony sóz óneriniń janashyry, oqyrman tárbıesine jan-tánimen berilgen maman retinde biledi.
Bul ıgi joldy onyń qyzy Galına Vasılevna Nagornyh jalǵastyrdy. Ol da 40 jyldan astam ýaqytyn kitaphana isine arnap, oqyrmanmen jumys isteýdiń úzdik úlgisin kórsetti. Osylaısha, áýlet ishinde qalyptasqan dástúr úzilmeı, jańa býynǵa jetti.
Qazaqstanda kitap aptalyǵy bastaldy: 1 500-den astam is-shara ótedi
Oqý-aǵartý mınıstrliginiń málimetinshe, búginde bul sabaqtastyqty Oktıabr mektebiniń bastaýysh synyp muǵalimi Elena Aleksandrovna Shekotova jalǵastyryp otyr. Pedagog erekshe bilim berýdi qajet etetin balalarmen jumys istep, olardyń kitapqa qyzyǵýshylyǵyn arttyrýǵa kúsh salady. Ol bala kezinen kitaphanashylar ortasynda ósip, kóp oqyǵan. 11 jasynan bastap óleń jazýǵa den qoıǵany – onyń shyǵarmashylyqqa jaqyndyǵyn aıǵaqtaıdy.
Otbasylyq dástúr jas býyn arasynda da óz jalǵasyn taýyp otyr. Muǵalimniń qyzy Sofıa kitaphananyń belsendi oqyrmany ǵana emes, ǵylymı izdeniske de beıim. Ol «Jasandy ıntellekt kózimen ádebı shyǵarmashylyq. Algorıtmnen ǵajaıyp týýy múmkin be?» atty ǵylymı-tájirıbelik konferensııada jeńimpaz atanǵan.
Osylaısha, Qarasý óńirindegi bul áýlet kitap oqý mádenıetin ulyqtap, rýhanı qundylyqtardy urpaq sanasyna sińirýdiń jarqyn úlgisin kórsetip otyr.
Astanada halyqaralyq kitap jármeńkesi ótedi