Saıası sholýshy Ǵazız Ábishev QSZI-diń «Konstıtýsııalyq reforma jáne qoǵamdyq dıalog: bolashaqty qalyptastyrý» atty saraptamalyq alańynda jańa Ata ańnyń Qazaqstan jastary úshin qandaı mańyzǵa ıe ekenin aıtyp berdi, dep habarlaıdy Egemen.kz.
Onyń aıtýynsha, jańa Konstıtýsııa – uzaq merzimdi joba, ony júzege asyrý mindeti dál qazirgi stýdentter men jas mamandardyń enshisinde.
«Ata Zań qazaqstandyq jastar úshin óte mańyzdy. О́ıtkeni aldaǵy ýaqytta jas urpaq óz ómirin jańa Konstıtýsııa aıqyndap bergen qaǵıdattar aıasynda quratyn bolady», dedi ol.
Sondaı-aq, sarapshy azamattarǵa quqyqtyq artyqshylyqtar beretin qazaqstandyq reformalardyń progressıvti sıpatyna toqtaldy.
«Jańa Konstıtýsııa bilim berý, ǵylymdy damytý jáne azamattyq quqyqtardy júzege asyrý salalarynda óte kóp múmkindik pen kepildik beretinin túsiný qajet», dedi óz sózinde Ǵazız Ábishev.
Saıası sholýshynyń aıtýynsha, bul jaǵdaı ótken kezeńderge múlde uqsamaıdy. Ol kezdegi konstıtýsııalyq reformalarǵa halyqaıtarlyqtaı keń qatysqan joq, al sheshim kóbine bıliktiń joǵary eshelondarynda ǵana qabyldanyp jatty.
«2007 jáne 2016 jyldary aýqymdy túzetýler máselesi Parlament qabyrǵasynda sheshiletin. Depýtattar jınalyp, ózgeristerdi qabyldaı beretin edi. Al halyq Konstıtýsııanyń ózgergenin tipti baıqamaı da qalatyn. Búgin, 2026 jyly, azamattarǵa saılaý ýchaskelerine kelip, sol bıýlletenderdi óz qolymen ustap kórý usynylyp otyr», dedi ol.
Sonymen qatar, Ǵazız Ábishev jańa Ata Zań jobasy joǵarydan túsken pármen arqyly jasalǵan dırektıva emes, qoǵamdyq dıalogtyń nátıjesi ekenine erekshe mán berdi. Ol qujatqa engizilgen kóptegen túzetýler keń qoǵamdyq talqylaýlar men azamattardyń usynystary negizinde qabyldanǵanyna da erekshe nazar aýdardy.
Sóz sońynda saıası sholýshy jastardy tek belsendilik tanytyp qana qoımaı, tikeleı óz erkin bildirý arqyly el taǵdyryna jaýapkershilik alýǵa shaqyrdy.
«Jastar qazirdiń ózinde eldi basqarýdy úırenýi kerek, memlekettiń taǵdyryn óz qolyna alyp, osy referendýmǵa qatysýy qajet. Jáne ózderi eń durys dep sanaıtyn sheshimdi qabyldaýy tıis», dep túıindedi ol.