Gazeta.uz derekkózi boıynsha Qazaqstan, AQSh jáne О́zbekstan úkimetteri Ortalyq Azııa ınvestısııalyq seriktestigin qurǵanyn jarııalaǵanyn, onyń alǵashqy bes jyldaǵy tabysy 1 mlrd AQSh dollarynan asatynyn málim etti, dep habarlaıdy Egemen.kz
«Osy bastama aıasynda О́zbekstannyń Investısııalar jáne syrtqy saýda mınıstrligi, «Astana» halyqaralyq qarjy ortalyǵy jáne AQSh-tyń Halyqaralyq Damý jónindegi Qarjy Korporasııasy (DFC) bes jyl ishinde kem degende 1 mıllıard dollar tartý úshin barlyq kúsh-jigerin salady», delingen habarlamada.
Ortalyq Azııa ınvestısııalyq seriktestigi «Halyqaralyq ınfraqurylym sapasynyń standarttaryn mysalǵa keltiretin jáne ınklıýzıvti, ashyq jáne ornyqty ınvestısııalardy alǵa tartatyn» jeke sektor basqaratyn jobalardy ilgeriletedi. Bul rette seriktester jobalardyń tabysy men oń áserin maksımaldy túrde arttyrady jáne aımaqqa qosymsha jeke ınvestısııalardy jumyldyrady. Ortalyq Azııa ınvestısııalyq seriktestigi C5 + 1 platformasy arqyly jumys isteıdi (Ortalyq Azııa elderi – AQSh).
«Bul bastama Ortalyq Azııanyń barlyq elderin nyǵaıtý jáne órkendetý úshin saýdany, damýdy jáne sınergııany arttyrý múmkindikterin paıdalanýǵa tyrysady. Aımaq COVID-19 pandemııasynan týyndaǵan ekonomıkalyq quldyraýdy qalpyna keltirýge tyrysyp jatqan kezde, mundaı yntymaqtastyq pen turaqtylyq burynǵydan da mańyzdy bolyp otyr», deıdi sarapshylar.
Aımaqtyq jobalardy qoldaýmen qatar, DFC О́zbekstannyń Investısııalar jáne syrtqy saýda mınıstrligimen jáne «Astana» halyqaralyq qarjy ortalyǵymen ekijaqty túsinistik memorandýmdaryna qol qoıý arqyly Ortalyq Azııadaǵy ekijaqty seriktestigin tereńdete beredi.