Mańǵystaý oblysy boıynsha jańa jyldyń alǵashqy 5 kúninde koronavırýs ınfeksııasyn juqtyrǵan 49 jaǵdaı tirkeldi, dep habarlaıdy Egemen.kz
Bul kórsetkish ótken jyldyń jeltoqsan aıynyń alǵashqy kúnderimen salystyrǵanda joǵary. Bul týraly Qoǵamdyq kommýnıkasııa ortalyǵynda ótken brıfıngte Mańǵystaý oblysy sanıtarııalyq-epıdemııalyq baqylaý departamentiniń basshysy Ǵazız Nadýev málim etti.
Mańǵystaý oblysynyń aýmaǵynda 2020 jyldyń 27 naýryzy men 5 qańtar aralyǵynda (shaǵymy+shaǵymsyz) 3759 COVID -19 jaǵdaıy tirkeldi. Onyń ishinde 1297 shaǵymy bar, 2462 shaǵymsyz naýqas anyqtalyp otyr. Aýrýshańdyqtyń kórsetkishi 531,4 quraıdy. Reprodýktıvti kórsetkish 1,02. Tósek qorynyń kórsetkishi 23%.
«Epıdemııalyq taldaý qorytyndysy naýqastyń 50 paıyzdan astamy buryn koronavırýs indetin juqtyrǵandarmen tyǵyz qarym qatynasta bolǵandyǵyn kórsetti», dedi Ǵazız Nadýev.
Aıta keteıik, 2020 jyldyń 1 tamyzynan bastap 2021 jyldyń 5 qańtaryna aıyna deıin 418 koronavırýstyq pnevmonııa (test synamasy teris nátıje berdi) tirkeldi. Onyń ishinde 14 jasqa deıingi balalar 47% qurady. Al 60-tan asqan naýqastar 36,0 paıyzdy qurap otyr.
Sondaı-aq, ótken jyldyń 1 qyrkúıeginen osy kúnge deıin mektep oqýshylarynyń arasynan 37 «COVID -19» jaǵdaı anyqtaldy. Onyń ishinde, onlaın rejımde bilim alýshylar sany - 35, oflaın ádispen - 2.
Pandemııa bastalǵaly 166 medısına qyzmetkeri «COVID -19» ınfeksııasyn juqtyrdy. Oblys kóleminde koronavırýs ınfeksııasyn PTR tásilimen anyqtaýǵa 6 laboratorııa jumys isteıdi. Onyń 1-eýi Ulttyq saraptama ortalyǵy, 4-eýi jeke menshik zerthanalar (Olımp, Chakýr, Invıvo, Etalon) jáne taǵy bir zerthana Jańaózen qalalyq kópbeıindi aýrýhanasynda ornalasqan. Osy kúnge deıin barlyǵy 221 326 adam tekserildi. Orta eseppen, táýligine 1 541 adam PTR zertteýden ótkiziledi. Ulttyq saraptama ortalyǵynda 26 752 test synamasy bar.
Oblysta 17 tamyzdan bastap 24 monıtorıng toby quryldy. Búgingi tańda monıtorıng tobymen 982 reıd júrgizilip, 3571 nysan tekserildi. Reıd barysynda 155 nysanda buzýshylyqtar anyqtalyp, 138 (24 jeke kásipker, 113 jeke tulǵa, 1 zańdy tulǵa) ákimshilik hattama (12 mln. 695 460 tg.) toltyryldy.
«6-qazannan bastap, О́zbekstanmen shekaralas jatqan «Tajen» avtomobıl ótkizý pýnkti arqyly 13958 avtokólik jáne 749 jaıaý jolaýshy kirdi. Pýnktten ótken 749 adamnyń barlyǵy tekserilip, ekeýiniń koronavırýs ınfeksııasyna tapsyrǵan test synamasy oń nátıje berdi», dedi Ǵazız Nadýev.
Baspasóz konferensııasynda Mańǵystaý oblystyq modýldi stasıonardyń basshysy Shaıahmadın Berqalıev te qatysty. Onyń málimetinshe, modýldi stasıonarda 52 adam em qabyldap jatyr. Onyń 12 jansaqtaý bóliminde jatyr. 17 naýqas aýyr halde jatyr. Onyń 5 óte aýyr jaǵdaıda.
«Aýrýhanaǵa kóbinese jasy 60-tan asqan adamdar túsedi. Olar júrek patologııasy, ınsýlt, qan qysymy, sahar dıabeti sııaqty basqa da ilespe aýrýlardan zardap shegip otyr. Sol sebepti medısınalyq mekemege túsýshiler jan saqtaý bólimine jatqyzylady. Bul bólim 20 tósek orynǵa qarastyrylǵan. Reanımasııalyq bólimde 35 naýqas em alyp jatyr, ıaǵnı bul bólimniń 60 paıyzy tolyp tur. Stasıonarǵa táýligine, shamamen, 3-5 adam kelip túsedi. Olardyń kóbi múmkindiginshe ambýlatorııalyq emge jiberiledi», dedi Ǵazız Nadýev.
Aıta keteıik, modýldi stasıonar ashylǵaly osy kúnge deıin 160-qa jýyq naýqasty qabyldady.