TúrkPA úıymynyń Bas hatshysy Altynbek Mamaıýsýpov Qazaqstan Respýblıkasy Prezıdenti Qasym-Jomart Toqaevtyń «Táýelsizdik bárinen qymbat» atty maqalasynyń halyqaralyq qatynastardaǵy ózara senimdi nyǵaıta túsýde mańyzy zor ekenin aıtty, dep habarlaıdy Egemen.kz.
Halyqaralyq Túrki akademııasy 8 qańtar kúni Nur-Sultan qalasynda uıymdastyrǵan «Túrki álemi: tarıhı-mádenı mura» halyqaralyq konferensııasynda arnaıy baıandama jasaǵan TúrkPA Bas hatshysy birqatar sheteldik saıasatkerlerdiń arandatýshy málimdemelerine qatysty oılarymen bólisti:
«Búginde halyqaralyq qaýymdastyq sońǵy onjyldyqtaǵy eń ótkir senim daǵdarysyn bastan ótkerýde. Qazirgi zamanǵy qaýip-qaterlerge qarsy bizdiń elderimiz aımaqtyq jáne jahandyq qaýipsizdik pen beıbitshilikti nyǵaıta túsýge baǵyttalǵan birqatar bastamalar arqyly ońtaıly jaýap bere alady.
Osy oraıda Prezıdent Qasym-Jomart Kemeluly Toqaevtyń sońǵy oqıǵalar turǵysynan shyndyǵynda da óte ózekti máselelerdi kótergen ári Qazaqstannyń aldaǵy damý baǵdaryn aıqyndaı túsetin maqalasyn aıryqsha atap ótýge bolady» dedi ol.
Aıta ketý kerek, onlaın-offlaın rejımde ótken sharaǵa 20-dan astam memleketten ǵalymdar men sarapshylar, sondaı-aq, túrki elderiniń birqatar resmı tulǵalary, halyqaralyq uıymdardyń ókilderi qatysty.