Búgin, ıaǵnı 10 qańtarda elordada 2 199 astanalyq týǵan kúnin atap ótti. Onyń ústine bul kúni 31 adam kámelet jasyna tolyp otyr. Al saılaýǵa 16 316 qala turǵyny alǵash ret qatysty, dep habarlaıdy Egemen.kz
Ákimdiktiń resmı saıtynyń málimetinshe, búgin elordanyń jas turǵyny Baýyrjan Aqshabaevtyń ómirinde eki mańyzdy oqıǵa bolyp otyr. Bul kúni ol kámelet jasyna tolyp qana qoımaı, alǵash ret daýys berdi.
«Saılaýǵa nelikten qatysý kerek? Men úshin onyń jaýaby óte qarapaıym. Ár azamat óz eliniń ómirine aralasýy kerek. Bul — erekshe sezim. Qazaqstan azamaty ekendigime jáne tarıhı sátterge aralasatynyma qýanyp ári maqtanyp otyrmyn», deıdi Baýyrjan.
Ol týǵan kúninde №87 ýchaskege baryp, óziniń eresek ómirindegi alǵashqy azamattyq boryshyn oryndady. Sondaı-aq, Baýyrjan qurdastaryna ózinen úlgi alýǵa jáne bolashaqqa senimmen qaraýǵa keńes berdi.
«Álemdi ózgertý úshin ózgeristi aldymen ózińnen bastaý kerek. Saılaý — azamattyq jaýapkershilikti kórsetý jáne elimizdiń taǵdyryn ózgertý úshin eń qolaıly sát», dedi jas saılaýshy.
Baýyrjan Aqshabaevqa alǵashqy saılaýdan estelik retinde Abaıdyń kitaby syıǵa berildi.