ÝRANǴA ORYN JOQ
Ýkraına prezıdenti Vıktor Iаnýkovıch ózderinde saqtalyp qalǵan baıytylǵan qarýlyq ýrandy 2012 jylǵa deıin joıý jóninde sheshimge kelgenin habarlady.
Muny jurtshylyq Vashıngtonda ótken ıadrolyq qaýipsizdik jónindegi sammıttiń sheshimine jedel únqosý dep qabyldady. Bul elde áli kúnge saqtalyp qalǵan 90 kılogramm baıytylǵan ýran bar eken. Odan birneshe atomdyq oqtumsyq jasaýǵa múmkindik bar kórinedi.
LAŃKESTERDI AIYPTADY
Saýd Arabııasynda sharıǵat talaptaryn saraptaıtyn dinbasylar – Joǵarǵy úlemder keńesi óziniń úsh kúnge sozylǵan jabyq májilisinde lańkestikke naqty anyqtama berip, mundaı áreketter jónsiz dep taýyp, dinı turǵydan qaraǵanda ony qarjylandyrýǵa tyıym salynatynyn jarııalady. Bul endi shyn máninde keıbir ıslam atyn jamylǵan lańkestik uıymdarǵa aıtarlyqtaı soqqy bolmaq. Joǵarǵy úlemder keńesi óz sheshimderiniń tek Saýd Arabııasy ǵana emes, basqa elderde de kúshi barlyǵyn málimdedi.
KÚTPEGEN JEŃIMPAZ
Ulybrıtanııada parlament saılaýynyń naýqany jańasha ótip jatyr. Saılaýǵa túsken jetekshi partııalardyń kósemderi alǵash ret telepikir saıysyna túsip, óz baǵdarlamalaryn qorǵady. Bul joly dástúrli bılik úshin kúresetin eki partııa – leıborıster men konservatorlarǵa qosa, telesaıysqa lıberal-demokrattar kósemi Nık Klegg te jiberilgen edi. Kórermenderdiń baǵasy boıynsha sol Klegg jeńiske jetip, jurtty tańdandyrdy. Konservator Devıd Kemeron ekinshi bolsa, bıliktegi leıborıster partııasynyń kósemi Gordon Braýn báriniń sońynda qaldy.
BAKIEVTI ShAQYRADY
Ádettegishe Belorýssııa prezıdenti Aleksandr Lýkashenko tosyn málimdeme jasady: óz eli bılikten qýylǵan Qyrǵyzstan prezıdenti Qurmanbek Bakıevti qabyldaýǵa ázir dedi. Kúni keshe Bakıev qaıda bararyn bilmeı turǵan kezde muny nege aıtpaǵan deısiń-aý. Qazaqstan kórshi elde qantógiske jol bermeý úshin bılikten aıyrylǵan Bakıevti ýaqytsha Tarazǵa ákelgeni belgili. Qazir ol Qazaqstandy tastap shyqqany da málim.
KEPILDIKKE USTAǴAN
Taılandta qyzyl jeıdeliler dep atalatyn oppozısıonerlerdiń qarsylyq aksııasynyń bastalǵanyna, mine, aıdan asty. Olar úkimetpen kelissózge otyrsa da, óz raılarynan qaıtar emes. Parlamentti taratýdy talap etedi, demek, qazirgi úkimet te ketýge tıis. Olar jańa áreketterge kóshipti – juma kúni polısııanyń joǵary shendi eki ofıserin kepildikke alypty. Sondaǵy aıtatyndary – oppozısıonerlerdiń qaýipsizdigin qamtamasyz etý. Endi bul – órkenıetti talapqa kelmeıtin, zańǵa múlde syıyspaıtyn, lańkester paıdalanatyn jol.
KÚNDI KО́LEGEILEGEN KÚL
Islandııada asa qýatty janartaý atqylaýynan Ulybrıtanııanyń áýe keńistigine ushqan kúl bulty aspanǵa jaıylyp, avıasııanyń ushýyna kedergi jasady. Balqyǵan magma muzǵa jaıylǵanda, sodan paıda bolǵan býmen qosa aspanǵa qalyń kúl bulty kóterilgen. Kúl-bult aıtarlyqtaı bıikke kóterilgendikten, ol adamnyń tynys alýyna onshalyqty qıyndyq keltirmegenmen, sol bıiktikte ushaqtardyń ushýyna qaýipti eken. Qazir búkil Eýropa áýe kompanııalary derlik ushaqtaryn ushyra almaı, mıllıardtaǵy eýro zııan shekse, jolaýshylar joldan qalyp otyr.
JER ASTYMEN KIRMEK
Egıpettiń qorǵanys kúshteri óz eli men Palestına avtonomııasynyń Gaza sektorynyń arasynda kontrabandalyq maqsatta jasalǵan 10 tonnel barlyǵyn anyqtapty. Mundaı tonnelderdiń barlyǵy buryndary da aıtylatyn. Tipti oǵan jol bermes úshin shekara boıyna jer astyna tereńdetip kedergi de qoımaq bolǵan. Sóıtse de tonnel qalaı da Mysyrdyń bir jerinen shyǵady ǵoı. Sony anyqtaýdyń qıyn bolǵanyna tańdanasyń. Shekarashylary tym qamsyz bolǵan-aý degen oı keledi.
ZILZALANYŃ QURBANDARY
О́tken sársenbide Qytaıdyń soltústik batysynda tirkelgen zilzalanyń saldary aýyr bolyp otyr. Qaza tapqandardyń sany 1079 adamǵa jetti, joǵalǵandar 300-deı, jaraqat alǵandar 11,5 myńdaı bolsa, olardyń 1180-iniń jaǵdaıy asa qıyn eken. Qıraǵan úılerdiń astynan áli de tiri qalǵan adamdar tabylyp jatqan kórinedi. Al qutqarý jumysyna 7 myńnan asa adam jumyldyrylypty.
Ázirlegen Mamadııar JAQYP.