Shymkent qalasynyń memlekettik eńbek ınspeksııasy basqarmasynyń basshysy Baýyrjan Qaljanov atqarylǵan jumystardy jáne 2021 jylǵy jumys josparyn qala ákimine baıandady, dep habarlaıdy Egemen.kz.
Baýyrjan Ahmetáliuly bekitilgen ındıkatorlardyń oryndalýy, eńbek qatynastaryn retteý, jalaqy qaryzdaryn joıý, áleýmettik áriptestik, eńbek qaýipsizdigi jáne eńbekti qorǵaý monıtorıngi, sıfrlandyrý baǵyttary boıynsha josparlardan habardar etti.
Eńbek qaýipsizdigi jáne eńbekti qorǵaý monıtorıngi baǵytynda birqatar jobalar engizilmek. 2020 jyly 48 jazataıym oqıǵa oryn alyp, onyń ishinde 56 adam zardap shekti. 2018, 2019 jyldarǵa qaraǵanda bul kórsetkish birshama tómendegen. «Halyqtyq baqylaý» jobasyn iri kásiporyndarda engizýge tapsyrma berilgen bolatyn. Qazirgi tańda bul jobaǵa 13 kásiporyn qosylǵan. Sonymen qatar, óndiristik jaraqattanýdy aıtarlyqtaı tómendetýge, jazataıym oqıǵalar men eńbek jaǵdaılary zııandy jumys oryndarynyń sanyn qysqartýǵa múmkindik beretin «Nóldik jaraqat – Vision Zero» tujyrymdamasyn kásiporyndarda engizý ózekti bolyp otyr. Qazir bul joba 14 kásiporynda júzege asyryldy. «Sıfrly Qazaqstan» memlekettik baǵdarlamasy boıynsha salada birqatar jumystar qolǵa alynýda. Qazirgi tańda jumys berýshiler eńbek sharttaryn elektrondyq formatta júrgizýdi qamtamasyz etý qajet. Bul baǵyttta 2021 jyly 4457 kásiporyn, 67 705 eńbek shartyn engizý josparlanyp otyr. Búginge deıin 4612 kásiporyn osy júıege qosylǵan bolatyn.