«DIMASH DIGITAL SHOW» álemdik pandemııa bastalǵannan bergi ánshiniń alǵashqy jahandyq qoıylymy boldy, dep habarlaıdy dimashnews.
Konserttiń onlaın-chaty bir sekýndqa da tynyshtalmady, barlyq jankúıerler súıikti ártisteriniń ónerin qaıta kórgenderine óte qýandy. Dears-tiń aıtýynsha, olardyń barlyǵy Dımashtyń jeke konsertin qatty saǵynǵan.
Shoý barysynda qazaqstandyq oryndaýshy 6 tilde: qazaq, ıtalıan, fransýz, qytaı, aǵylshyn jáne orys tilderinde án aıtty. Sondaı-aq ol buryn sońdy bolmaǵan jańa mazmundy usyndy: ánder, olardyń arasynda ánshiniń ózi jazǵan kompozısııalar bar. Onlaın-format álemniń túkpir-túkpirindegi Dears-ke Dımashtyń konsertin úıden shyqpaı-aq, úı jaǵdaıynda tamashalaýǵa múmkindik berdi.
Sondaı-aq konsertti «kórý» geografııasy da aıtarlyqtaı keńeıdi: Dears «DIMASH DIGITAL SHOW» konsertin álemniń 100-den astam elinen kórdi. Tixr amerıkalyq strımıngtik platformasy ókilderiniń aıtýynsha, alǵash ret sheteldik oryndaýshynyń konsertine bıletter satý osyndaı joǵary kórsetkishterge qol jetkizgen.
Dımash kóptegen jankúıerine jańa formatqa qaramastan, onyń alǵashqy onlaın-konsertin qoldaǵany úshin alǵys bildirdi.
«Meniń alǵashqy onlaın-konsertime qatysyp, qoldaý kórsetkenderdiń barlyǵyna úlken rahmet! Pandemııa bizdi uzaq ýaqyt boıy júzdestirmegeni óte ókinishti, sondyqtan men búgin sizderdiń aldaryńyzda óner kórsetkenime qýanyshtymyn. Men sizderdi kórmesemde, meniń janym sizderdiń barlyq qoldaýlaryńyz ben kúsh-jigerlerińizdi sezindi, sizder árqashan meni shabyttandyrasyzdar jáne jańa jetistikterge kúsh beresiz! Búgingi shoýdy tolyq tamashaladyńyzdar degen senimdemin. Biz sizdermen óte jaqyn arada kezdesemiz dep úmittenemin!».
Esterińizge sala keteıik, Dımashtyń onlaın-konsertin 16 qańtar men 23 qańtar aralyǵynda shekteýsiz kóre alasyzdar. Konserttiń daıyndyq jumystaryna baılanysty ýaqytsha toqtatylǵan bıletter satylymy shoý aıaqtalǵannan keıin qaıta bastalady.