Qazaqstanda bıyl 6 mıllıon adamǵa koronavırýsqa qarsy vaksına salý kózdelgen. Bul týraly Úkimet otyrysynda Densaýlyq saqtaý mınıstri Alekseı Soı málim etti, dep habarlaıdy Egemen.kz
«Kontıngent kelesi tártipte belgilengen: birinshi kezeńde ınfeksııalyq aýrýhanalardyń medısına qyzmetkerlerine, jedel járdem qyzmetiniń mamandaryna, jan saqtaý bóliminiń, alǵashqy medısınalyq-sanıtarlyq kómek qyzmetiniń, aýrýhanalardyń qabyldaý bóliminiń, sanıtarlyq-epıdemıologııalyq qyzmettiń mamandaryna, naqtyraq aıtqanda 100 myńǵa tarta azamatqa vaksına salynady», - dedi Alekseı Soı Úkimet otyrysynda.
Onyń aıtýynsha, ekinshi kezeńde jalpy bilim beretin mektepterdiń muǵalimderine, JOO oqytýshylaryna, vedomstvolyq medısına qyzmetiniń mamandaryna, naqtyraq aıtqanda naýryz aıynan bastap shamamen 150 myń adamǵa ekpe egiledi. Úshinshi kezeńde mektep-ınternattarynyń pedagogterine, balalar men mektepke deıingi mekemelerdiń qyzmetkerlerine, stýdentterge, sozylmaly aýrýlary bar azamattarǵa (sáýirden bastap shamamen 600 myń adam) vaksınasııalaý júrgiziledi.
Vaksınany jetkizý legi 4 kezeńnen turady.
• Birinshi kezeń - óndirýshiden biryńǵaı dıstrıbıýtordyń qoımasyna deıin jetkizý;
• Ekinshi kezeń – biryńǵaı dıstrıbıýtordyń qoımasynan Densaýlyq saqtaý basqarmalarynyń dárihanalyq qoımasyna deıin jetkizý;
• Úshinshi kezeń - densaýlyq saqtaý basqarmalarynyń dárihanalyq qoımasynan aýdandar men qalalardyń medısına uıymdaryna deıin jetkizý;
• Tórtinshi kezeń – medısına uıymdarynda osy vaksınalardy saqtaý.