Taǵdyr taýqymetin molynan tartqan sportshylardyń biri – Elena Mýhına. Kózi tiri bolǵanda ataqty gımnasshy byltyrǵy jyldyń sońynda 60 jasqa keletin edi. Alaıda jattyǵý barysynda aýyr jaraqat alǵan ol aıyqpas dertke shaldyǵyp, uzaq ýaqyt boıy tósek tartyp jatyp qaldy. Al ol 2006 jyldyń 22 jeltoqsanynda jaryq dúnıemen qosh aıtysty. Ol nebári 46 jasta edi.
Elena Vıacheslavovnanyń taǵdyry adam qyzyǵarlyqtaı emes. Máskeýde týyp-ósken ol anasynan eki jasynda aıyryldy. Bárine kináli ákesi. Araqqa sylqııa toıyp alǵan ol abaısyzda ózderi turyp jatqan úıdi órteıdi. Sharpyǵan jalynnyń qushaǵynda qalǵan anasy mert bolady. Odan keıin-aq ákesi ońalmady. Vıacheslav basqa bir kelinshektiń eteginen ustap, belgisiz jaqqa ketti. Al kishkentaı búldirshinniń tárbıesimen ájesi aınalysty. Sol Anna Ivanovnanyń meıirimi men shapaǵatynyń arqasynda Elena el qatarly bilim alyp, sporttyń sıqyrly álemine boılady.
Sporttyq gımnastıkany serik etken qarshadaı qyz ýaqyt oza óz qatarynyń aldy boldy. Alǵashynda Antonına Olejko men Aleksandr Eglıtanyń qol astynda jattyqsa, keıinnen Mıhaıl Klımenkonyń úıirmesine aýysty. Kún sanap sheberligi shyńdala túsken Mýhına kóp uzamaı maıtalman mamandardyń qyraǵy nazaryna ilikti. Tipten onyń 1976 jyly Monrealda alaýy tutanǵan Olımpııa oıyndaryna qatysýy da múmkin edi. Biraq «tájirıbesi az» degen jeleýmen Elena Úıeńki japyraqtar elindegi jarystan shet qaldy. Bapkerlerdiń tańdaýy ózge gımnasshylarǵa tústi.
Joǵarydaǵy jaǵdaı 16 jasar qyzdyń jigerin jasytqan joq. Ol kúrdeli elementterdi birinen keıin birin minsiz oryndap, óziniń myqtylyǵyn túbegeıli moıyndata bastady. Qysqa ǵana merzim aralyǵynda halyqaralyq arenada aýyz toltyryp aıtarlyqtaı tabystarǵa qol jetkizdi. 1978 jyly Fransııanyń Strasbýrg qalasynda uıymdastyrylǵan álem chempıonatynda úsh altyn medaldi moınynda jarqyratyp, barsha jurttyń nazaryn ózine aýdardy. Tarqatyp aıtsaq, Elena kópsaıys pen erkin jattyǵýda aldyna jan salmady. Komandalyq básekede de bas júldeni oljalady. Eki jattyǵýda kúmispen kúpteldi. Nátıjesinde, álemniń absolıýtti chempıony atandy. Atalǵan jarysta Mýhına Monreal Olımpıadasynda bes ret jeńis tuǵyryna kóterilgen aty ańyzǵa aınalǵan rýmynııalyq gımnasshy Nadıa Komanechıdiń ózin artqa tastady.
Jalpy 1977-1978 jyldary Mýhınanyń juldyzy jarqyraı jandy. Joǵarydaǵy tabysynan bólek, ol KSRO men qart qurlyqtyń teńdessizi dep tanyldy. Álem kýbogynda altyn tuǵyrǵa kóterildi. Onyń jeńisti joly osylaı jalǵasyp jatty. Alda – Máskeý Olımpıadasy menmundalap turdy. Sol jarysqa Elena jatpaı-turmaı daıyndaldy. Keńes Odaǵynyń bas shaharynda ótetin ǵalamdyq dodada Mýhınanyń shoqtyǵy bıik bolatynyna eshkimniń de kúmáni joq edi.
Elena óte eńbekqor edi. Ol erkinsý, bosańsý degendi bilmeıtin. Zalda janyn salyp jattyǵady. Bapkeri de tym talapshyl ári qatal edi. Ol túrli eksperımentter jasaýdy unatatyn. Shákirtteriniń ashy terin ábden syǵyp alǵansha damyl tappaıtyn. Mine, Mýhına sondaı mektepten ótti. Mıhaıl Klımenko ony áý bastan asa kúrdeli tásilderdi oryndaýǵa beıimdedi. Al oryndalatyn ádis neǵurlym kúrdeli bolsa, jaraqat alý qaýpi soǵurlym joǵary bolatyny túsinikti ǵoı. Biraq bapkeri ondaı «maıda-shúıde» nárselerge asa mán bermeıtin. Mysaly, 1975 jyly KSRO halyqtary spartakıadasynda Mýhınanyń moıyn omyrtqalaryna zaqym keldi. Ondaı jaǵdaıda jattyǵý bylaı tursyn, júrip-turýdy ózi qıyn. Oǵan qarap jatqan Klımenko joq. Ol kún saıyn Elenany aýrýhanadan alyp ketip, jattyǵý jasatatyn.
Ýaqyt oza Elenanyń ózi de anaý-mynaý jaraqattardy elemeıtin boldy. Qabyrǵasy qaıysyp, saýsaqtary synyp, mıy shaıqalsa da myńq etpeıtin. Klımenkonyń qaharynan qoryqqany sonshalyq, Mýhına eshkimge baıqatpaı nashatyr spırtin ıiskep alatyn da túk bolmaǵandaı jattyǵýyn ári qaraı jalǵastyra beretin.
1980 jyldyń 3 shildesi. Máskeý Olımpıadasynyń bastalýyna eki aptadan asa ýaqyt qaldy. KSRO quramasy óziniń sońǵy oqý-jattyǵý jıynyn Mınskide ótkizip jatty. Birde shuǵyl sharýalardyń shyǵýyna baılanysty Mıhaıl Klımenko dereý Máskeýge ushady. Dál sol kúni Mýhına jalǵyz ózi tomarǵa shyǵyp, asa bir kúrdeli saltony oryndaýǵa bekindi. Ornynan sekirgen Elena áýede 540 gradýske aınalamyn dep, aǵattyq jiberdi. Sonyń saldarynan jerge basymen ońbaı qulady. Zalda únsizdik. Ataqty sportshy es-tússiz edende jatyr. Jattyqtyrýshylar 03 nómirine qońyraý shaldy. Shuǵyl jetken jedel járdem mashınasy ony dereý aýrýhanaǵa alyp ketti. Kóp uzamaı gımnasshy qyzdyń moıyn omyrtqalary qatty zaqymdanǵan degen sýyt habar jetti.
20 jastaǵy sportshyny ajal tyrnaǵynan aman alyp qalý úshin dárigerler baryn saldy. Áıteýir, Elena kózin ashyp, esin jıdy. Biraq sport ta, basqasy da jaıyna qaldy. Áıgili sportshy aıaǵynan tik tura almaı, ómir boıy múgedekter arbasyna tańyldy. 28 jyl boıy ol tósek tartyp jatyp, 2006 jyldyń 22 jeltoqsanynda qaıtys boldy. Mine, keshe ǵana mıllıondaǵan kórermenniń kózaıymyna aınalǵan ataqty gımnasshynyń qaıǵyly taǵdyry osyndaı.
Al bapkeri she? Shákirti tósekke tańylyp jatqanda ol halin surap birde-bir ret ne úıine, ne aýrýhanaǵa kelmegen desedi. Biraq Elena Mýhına kóz jumǵan soń Mıhaıl Klımenko da kóp ómir súrmedi. Ol shákirtinen keıin bir jyldan soń, ıaǵnı týǵan kúninde dúnıeden ozdy. 2007 jyldyń 14 qarashasynda ol 65 jasqa kelgen edi.
ALMATY